ಮುಂಬಯಿ ವಿವಿ ಕನ್ನಡ ವಿಭಾಗ ಮತ್ತು ಗೋರೆಗಾಂವ್ ಕರ್ನಾಟಕ ಸಂಘದ ಸಹಯೋಗದಲ್ಲಿ ಶ್ರೀನಿವಾಸ ಜೋಕಟ್ಟೆ ಮತ್ತು ಅನಿತಾ ತಾಕೊಡೆ ಅವರ ಕೃತಿ ಬಿಡುಗಡೆ: ಜಯಲಕ್ಷ್ಮಿ ಜೋಕಟ್ಟೆಯವರಿಗೆ ಶ್ರದ್ಧಾಂಜಲಿ ಕಾರ್ಯಕ್ರಮ
ಮುಂಬಯಿ ವಿಶ್ವವಿದ್ಯಾಲಯ ಕನ್ನಡ ವಿಭಾಗ ಮತ್ತು ಗೋರೆಗಾಂವ್ ಕರ್ನಾಟಕ ಸಂಘಗಳ ಸಂಯುಕ್ತ ಆಶ್ರಯದಲ್ಲಿ ಶನಿವಾರ ಸಂಜೆ ಸಾಂತಾಕ್ರೂಜ್ ಪೂರ್ವದ ಕಲೀನಾ ವಿದ್ಯಾನಗರಿಯ ಜೆ.ಪಿ. ನಾಯಕ್ ಭವನದಲ್ಲಿ ಕಾರ್ಯಕ್ರಮವನ್ನು ಆಯೋಜಿಸಲಾಗಿತ್ತು. ಈ ಸಮಾರಂಭದಲ್ಲಿ ಪತ್ರಕರ್ತ ಶ್ರೀನಿವಾಸ ಜೋಕಟ್ಟೆ ಅವರ ಮೂರು ಕೃತಿಗಳು ಮತ್ತು ಕವಯತ್ರಿ ಅನಿತಾ ಪಿ. ತಾಕೊಡೆ ಅವರ ಒಂದು ಕೃತಿ ಸೇರಿ ಒಟ್ಟು ನಾಲ್ಕು ಕೃತಿಗಳನ್ನು ಬಿಡುಗಡೆ ಮಾಡಲಾಯಿತು. ಈ ಮೂಲಕ ಇತ್ತೀಚೆಗೆ ನಿಧನರಾದ ಜಯಲಕ್ಷ್ಮಿ ಜೋಕಟ್ಟೆ ಅವರಿಗೆ ಶ್ರದ್ಧಾಂಜಲಿಯನ್ನು ಅರ್ಪಿಸಲಾಯಿತು.
ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ವಹಿಸಿದ್ದ ಕನ್ನಡ ವಿಭಾಗದ ಮುಖ್ಯಸ್ಥರಾದ ಡಾ. ಜಿ.ಎನ್. ಉಪಾಧ್ಯ ಅವರು ಮಾತನಾಡಿ, “ಜೋಕಟ್ಟೆಯವರು ಬರೆದು ಜೀವಿಸಬಹುದು ಎಂದು ತೋರಿಸಿಕೊಟ್ಟವರು. ಪತ್ರಕರ್ತರಾಗಿ ಮತ್ತು ಲೇಖಕರಾಗಿ ಎರಡೂ ಕ್ಷೇತ್ರಗಳಲ್ಲಿ ಅವರ ಕೊಡುಗೆ ಅಪಾರ. ಕನ್ನಡ ವಿಭಾಗದ ವಿದ್ಯಾರ್ಥಿಗಳಿಗೂ ಅವರ ಮಾರ್ಗದರ್ಶನ ದೊರೆತಿದೆ. ಕತೆಗಾರರಾಗಿ ವಿಭಿನ್ನ ಮಾದರಿಯ ಕತೆಗಳನ್ನು ಬರೆದಿದ್ದಾರೆ. ಇಡೀ ಕರ್ನಾಟಕದಲ್ಲಿ ಜೋಕಟ್ಟೆಯವರ ಲೇಖನಗಳು ಪ್ರಕಟವಾಗದ ಪತ್ರಿಕೆಗಳೇ ಇಲ್ಲವೆನ್ನಬಹುದು. ಕನ್ನಡ ವಿಭಾಗದ ಪ್ರತಿಭಾವಂತ ವಿದ್ಯಾರ್ಥಿನಿ ಅನಿತಾ ಅವರ ಪ್ರಮುಖ ಮಾಧ್ಯಮ ಕಾವ್ಯ. ಕಾವ್ಯವನ್ನು ನವಿರಾಗಿ ಕಟ್ಟುವ, ಪ್ರತಿಮೆಯನ್ನು ಬಳಸಿಕೊಂಡು ಮಾತನ್ನು ಕಾವ್ಯವಾಗಿಸುವ ಕಲೆ ಅವರಿಗೆ ಒಲಿದಿದೆ. ಇವರ ಕವಿತೆಗಳು ಸ್ತ್ರೀವಾದಿ ಕವಿತೆಗಳಲ್ಲ, ಬದಲಿಗೆ ಆಶಾವಾದವನ್ನು ಹುಟ್ಟಿಸುವ ಹಾಗೂ ಜೀವನೋತ್ಸಾಹವನ್ನು ತುಂಬುವ ಕವಿತೆಗಳಾಗಿವೆ. ಈವರೆಗೆ ನಾಲ್ಕು ಕವನ ಸಂಕಲನಗಳನ್ನು ಪ್ರಕಟಿಸಿದ ಇವರು ಕಾವ್ಯ ಕ್ಷೇತ್ರದಲ್ಲಿ ಶಾಶ್ವತವಾಗಿ ಉಳಿಯಬಲ್ಲ ಕವಿತೆಗಳನ್ನು ಬರೆಯುವಲ್ಲಿ ಯಶಸ್ವಿಯಾಗಿದ್ದಾರೆ,” ಎಂದು ನುಡಿದರು.
ಕೃತಿಗಳ ಬಿಡುಗಡೆ ಮತ್ತು ಅನಿಸಿಕೆಗಳು
- “ಮೇಣಕ್ಕಂಟಿದ ಬತ್ತಿ” ಕವನ ಸಂಕಲನ ಬಿಡುಗಡೆ: ತಾಕೊಡೆ ಎಂಟರ್ಪ್ರೈಸಸ್ ಪ್ರಕಟಿಸಿದ “ಮೇಣಕ್ಕಂಟಿದ ಬತ್ತಿ” ಕವನ ಸಂಕಲನವನ್ನು ಸೂರ್ಯಕಾಂತ್ ಸುವರ್ಣ ಅವರು ಬಿಡುಗಡೆ ಮಾಡಿ ಮಾತನಾಡಿದರು. “ಅನಿತಾ ಅವರ ಆಳವಾದ ಅಧ್ಯಯನದ ಫಲಿತಾಂಶ ಮತ್ತು ಅವರ ಬರವಣಿಗೆಯಲ್ಲಿರುವ ಕಲಾತ್ಮಕತೆಯನ್ನು ‘ಸುವರ್ಣಯುಗ’ ಕೃತಿಯಲ್ಲಿ ಕಂಡರಿತಿದ್ದೇನೆ. ಅವರು ಕವಿ ಮಾತ್ರವಲ್ಲ, ಭಾವ-ಅನುಭಾವಗಳನ್ನು ಬರವಣಿಗೆಯ ಮೂಲಕ ಚಿತ್ರಿಸುವ ಕಲಾವಿದರೂ ಹೌದು. ಕನ್ನಡ ವಿಭಾಗದ ವಿದ್ಯಾರ್ಥಿಗಳಿಗೆ ಡಾ. ಜಿ.ಎನ್. ಉಪಾಧ್ಯರಂತಹ ಮಾರ್ಗದರ್ಶಕರು ಒದಗಿದ್ದು ಸಾಹಿತ್ಯಲೋಕದ ಭಾಗ್ಯ,” ಎಂದು ಹೇಳಿದರು.
- “ಅದೆಲ್ಲಾ ಬಿಟ್ಟು” ಕಥಾ ಸಂಕಲನ ಬಿಡುಗಡೆ: ಸಾಹಿತ್ಯ ಸುಗ್ಗಿ ಪ್ರಕಾಶನ, ಬೆಂಗಳೂರು ಪ್ರಕಟಿಸಿದ ಶ್ರೀನಿವಾಸ ಜೋಕಟ್ಟೆ ಅವರ “ಅದೆಲ್ಲಾ ಬಿಟ್ಟು” ಕಥಾ ಸಂಕಲನವನ್ನು ಪ್ರಶಸ್ತಿ ಪುರಸ್ಕೃತ ಕತೆಗಾರ್ತಿ ಮಿತ್ರಾ ವೆಂಕಟ್ರಾಜ್ ಅವರು ಬಿಡುಗಡೆ ಮಾಡಿದರು. “ಈ ಕೃತಿಯಲ್ಲಿ ಲೇಖಕರ ಸ್ವಭಾವ, ಮನೋಬಲ, ನಿರ್ಧಾರ, ಯೋಜನೆಗಳು ಒಂದೇ ರೀತಿಯಿದ್ದು, ಕಾದಂಬರಿಯಾಗಿ ಓದಿದ ಅನುಭವ ನೀಡುತ್ತದೆ. ನಮ್ಮೂರು ಮತ್ತು ಮುಂಬಯಿ ಇವೆರಡರ ಬದುಕು ಕಟ್ಟಿಕೊಳ್ಳುತ್ತಾ ಅಲ್ಲಿನ ಬಡಗು, ಸಂಘರ್ಷ, ದ್ವಂದಗಳನ್ನು ಉದ್ವೇಗವಿಲ್ಲದೆ, ತಾಳ್ಮೆಯಿಂದ ಪ್ರಸ್ತುತಪಡಿಸುವ ಸಾಮರ್ಥ್ಯ ಜೋಕಟ್ಟೆ ಅವರಿಗಿದೆ,” ಎಂದು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದರು.
- “ಪ್ರಚಂಡ ಮತ್ತು ಮಹಾಕಾಲ” ಹಾಗೂ ‘ಬದುಕು ಬತ್ತದ ಭರವಸೆ’ ಲೇಖನಗಳ ಕೃತಿ ಬಿಡುಗಡೆ: ಶ್ರೀರಾಮ ಪ್ರಕಾಶನ, ಮಂಡ್ಯ ಪ್ರಕಾಶಿತ “ಪ್ರಚಂಡ ಮತ್ತು ಮಹಾಕಾಲ” ಲೇಖನಗಳ ಕೃತಿ ಹಾಗೂ ‘ಬದುಕು ಬತ್ತದ ಭರವಸೆ’ ಲೇಖನಗಳ ಕೃತಿಗಳನ್ನು ಇಂಟರ್ನ್ಯಾಶನಲ್ ಇನ್ಸ್ಟಿಟ್ಯೂಟ್ ಟ್ರೇನಿಂಗ್ ಸೆಂಟರ್ (ಐಐಟಿಸಿ) ಸಂಸ್ಥೆಯ ನಿರ್ದೇಶಕರಾದ ವಿಕ್ರಾಂತ್ ಉರ್ವಾಳ್ ಅವರು ಬಿಡುಗಡೆಗೊಳಿಸಿ ಮಾತನಾಡುತ್ತ, ತನ್ನ ತಂದೆ, ಸ್ನೇಹಿತೆ ಮತ್ತು ಶಿಕ್ಷಕಿಯಾಗಿದ್ದ ತಾಯಿಯನ್ನು ಸ್ಮರಿಸಿಕೊಂಡರು. “ಶ್ರೀನಿವಾಸ ಜೋಕಟ್ಟೆಯವರು ಸ್ವಂತ ಅನುಭವವನ್ನು ಇಟ್ಟುಕೊಂಡು ಕಥೆಗಳನ್ನು, ಲೇಖನಗಳನ್ನು ಬರೆಯುತ್ತಾರೆ,” ಎಂದರು.
- ಗೋರೆಗಾಂವ್ ಕರ್ನಾಟಕ ಸಂಘದ ಉಪಾಧ್ಯಕ್ಷರಾದ ಸರಿತಾ ನಾಯಕ್ ಅವರು ಪ್ರಾಸ್ತಾವಿಕವಾಗಿ ಮಾತನಾಡಿದರು.
- ಪತ್ರಕರ್ತ ಡಾ. ದಿನೇಶ್ ಶೆಟ್ಟಿ ರೆಂಜಾಳ ಮತ್ತು ಸಾಹಿತಿ ನ್ಯಾಯವಾದಿ ಅಮಿತಾ ಭಾಗ್ವತ್ ಅವರು ಕೃತಿಗಳನ್ನು ಪರಿಚಯಿಸಿದರು.
- ಇತ್ತೀಚೆಗೆ ನಿಧನರಾದ ಶ್ರೀನಿವಾಸ ಜೋಕಟ್ಟೆ ಅವರ ಧರ್ಮಪತ್ನಿ ಜಯಲಕ್ಷ್ಮೀ ಎಸ್. ಜೋಕಟ್ಟೆ ಅವರ ನಿಧನಕ್ಕೆ ಸಂತಾಪ ಸೂಚಿಸಿ ಶ್ರದ್ಧಾಂಜಲಿಯನ್ನು ಅರ್ಪಿಸಲಾಯಿತು.
- ಕನ್ನಡ ವಿಭಾಗದ ಸಹ ಪ್ರಾಧ್ಯಾಪಕಿ ಡಾ. ಪೂರ್ಣಿಮಾ ಎಸ್. ಶೆಟ್ಟಿ ಅವರು ಅತಿಥಿಗಳನ್ನು ಪರಿಚಯಿಸಿ ಕಾರ್ಯಕ್ರಮವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದರು.
- ಸಾಹಿತ್ಯಾಸಕ್ತರು ಮತ್ತು ಕನ್ನಡಾಭಿಮಾನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಉಪಸ್ಥಿತರಿದ್ದರು.
