ಮುಂಬೈ, ಅ. 18: ಬಾಲಿವುಡ್ ನಟ ಟೈಗರ್ ಶ್ರಾಫ್ ಅವರ ಮೇಲೆ ಮುಂಬೈನ ಜುಹು ಪ್ರದೇಶದಲ್ಲಿ ಭಾನುವಾರ ಗುಂಡಿನ ದಾಳಿ ನಡೆದಿದ್ದು, ಅವರು ಯಾವುದೇ ಗಾಯಗಳಿಲ್ಲದೆ ಪಾರಾಗಿದ್ದಾರೆ. ಘಟನೆಯಿಂದ ಬಾಲಿವುಡ್ ಚಿತ್ರರಂಗವನ್ನು ದಶಕಗಳಿಂದ ಕಾಡುತ್ತಿರುವ ಭೂಗತ ಲೋಕದ ಬೆದರಿಕೆ, ಸುಲಿಗೆ ಮತ್ತು ಗುಂಡಿನ ದಾಳಿಗಳ ಕರಾಳ ಇತಿಹಾಸ ಮತ್ತೆ ಮುನ್ನೆಲೆಗೆ ಬಂದಿದೆ.
1960ರ ದಶಕದಿಂದಲೇ ಮುಂಬೈ ಭೂಗತ ಲೋಕಕ್ಕೂ ಹಿಂದಿ ಚಿತ್ರರಂಗಕ್ಕೂ ಸಂಪರ್ಕವಿದ್ದುದಾಗಿ ವರದಿಗಳು ಹೇಳುತ್ತವೆ. ಅಂದಿನ ದಿನಗಳಲ್ಲಿ ಹಾಜಿ ಮಸ್ತಾನ್‌ನಂತಹ ಭೂಗತ ಲೋಕದ ವ್ಯಕ್ತಿಗಳು ಚಿತ್ರರಂಗದ ಗಣ್ಯರೊಂದಿಗೆ ಸಂಪರ್ಕ ಹೊಂದಿದ್ದು, ಚಿತ್ರ ನಿರ್ಮಾಣಕ್ಕೆ ಪರ್ಯಾಯ ಹಣಕಾಸಿನ ನೆರವು ನೀಡುತ್ತಿದ್ದರು. ಆದರೆ 1980ರ ದಶಕದ ಕೊನೆ ಹಾಗೂ 1990ರ ದಶಕದಲ್ಲಿ ಈ ಸಂಬಂಧ ಬಲವಂತದ ಸ್ವರೂಪ ಪಡೆದುಕೊಂಡಿತು. ಚಿತ್ರ ನಿರ್ಮಾಣಕ್ಕೆ ಹಣ ಒದಗಿಸುವುದು, ವಿದೇಶಿ ವಿತರಣಾ ಹಕ್ಕುಗಳನ್ನು ಕೇಳುವುದು ಮತ್ತು ಕಲಾವಿದರ ಆಯ್ಕೆಯಲ್ಲಿ ಹಸ್ತಕ್ಷೇಪ ಮಾಡುವ ಮೂಲಕ ಚಿತ್ರರಂಗದ ಮೇಲೆ ಪ್ರಭಾವ ಬೀರುವ ಪ್ರಯತ್ನಗಳು ನಡೆದಿದ್ದವು.
1994ರ ಜೂನ್‌ನಲ್ಲಿ ಚಿತ್ರ ನಿರ್ಮಾಪಕ ಜಾವೇದ್ ರಿಯಾಜ್ ಸಿದ್ದಿಕಿ ಹತ್ಯೆಗೀಡಾದರು. ಅದೇ ವರ್ಷದ ಜುಲೈನಲ್ಲಿ ಫಿರೋಜ್ ಸರ್ಫರಾಜ್ ಖಾನ್ ಎಂಬ ನಿರ್ಮಾಪಕನ ಮೇಲೆಯೂ ದಾಳಿ ನಡೆದಿತ್ತು. 1997ರ ಮಾರ್ಚ್ 7ರಂದು ನಿರ್ಮಾಪಕ ಮುಕೇಶ್ ದುಗ್ಗಲ್ ಅವರು ಅಂಧೇರಿಯಲ್ಲಿರುವ ತಮ್ಮ ಕಚೇರಿಯಲ್ಲಿ ಗುಂಡೇಟಿಗೆ ಬಲಿಯಾದರು. ಅವರ ಹತ್ಯೆಯ ಹಿಂದೆ ಛೋಟಾ ರಾಜನ್ ಮತ್ತು ಛೋಟಾ ಶಕೀಲ್ ಬಣಗಳ ನಡುವಿನ ಸಂಘರ್ಷವಿರಬಹುದೆಂದು ತನಿಖಾಧಿಕಾರಿಗಳು ಶಂಕಿಸಿದ್ದರು.
1997ರ ಜುಲೈ 31ರಂದು ‘ತ್ರಿದೇವ್’ ಮತ್ತು ‘ಗುಪ್ತ್’ ಚಿತ್ರಗಳ ನಿರ್ದೇಶಕ ರಾಜೀವ್ ರೈ ಅವರ ಮೇಲೆ ತಾರ್ದೇವ್‌ನಲ್ಲಿರುವ ಕಚೇರಿಯ ಹೊರಗೆ ಗುಂಡಿನ ದಾಳಿ ನಡೆದಿತ್ತು. ಅವರ ಅಂಗರಕ್ಷಕ ಪ್ರತಿದಾಳಿ ನಡೆಸಿದ ಪರಿಣಾಮ ರಾಜೀವ್ ರೈ ಪ್ರಾಣಾಪಾಯದಿಂದ ಪಾರಾಗಿದ್ದರು. ಅಬು ಸಲೇಂನ ಗ್ಯಾಂಗ್‌ನ ಸದಸ್ಯರು ಈ ದಾಳಿಯಲ್ಲಿ ಭಾಗಿಯಾಗಿದ್ದರೆಂದು ವರದಿಯಾಗಿತ್ತು. ಇದಕ್ಕೂ ಮೊದಲು ಅವರಿಗೆ ಬೆದರಿಕೆಗಳು ಬಂದಿದ್ದವು ಎನ್ನಲಾಗಿದೆ.
ಇದಾದ ಕೇವಲ ಎರಡು ವಾರಗಳ ಬಳಿಕ, 1997ರ ಆಗಸ್ಟ್ 12ರಂದು ಟಿ-ಸಿರೀಸ್ ಸಂಸ್ಥೆಯ ಸ್ಥಾಪಕ ಹಾಗೂ ಸಂಗೀತ ನಿರ್ಮಾಪಕ ಗುಲ್ಶನ್ ಕುಮಾರ್ ಅವರು ಅಂಧೇರಿಯ ದೇವಸ್ಥಾನದ ಹೊರಗೆ ಗುಂಡಿನ ದಾಳಿಯಲ್ಲಿ ಹತ್ಯೆಗೀಡಾದರು. ಈ ಹತ್ಯೆ ಚಿತ್ರರಂಗ ಮತ್ತು ಸಂಗೀತ ಕ್ಷೇತ್ರದ ಮೇಲೆ ಭೂಗತ ಲೋಕ ಹೊಂದಿದ್ದ ಪ್ರಭಾವದ ಅತ್ಯಂತ ಭೀಕರ ಉದಾಹರಣೆಗಳಲ್ಲಿ ಒಂದಾಯಿತು.
1999ರ ಡಿಸೆಂಬರ್ 27ರಂದು ಚಿತ್ರ ನಿರ್ಮಾಪಕ ಹಾಗೂ ಆಡ್ಲ್ಯಾಬ್ಸ್ ಸಂಸ್ಥೆಯ ಸ್ಥಾಪಕ ಮನಮೋಹನ್ ಶೆಟ್ಟಿ ಅವರ ಹತ್ಯೆಗೆ ಯತ್ನ ನಡೆದಿತ್ತು. ಅಬು ಸಲೇಂ ಪರವಾಗಿ ಕಾರ್ಯನಿರ್ವಹಿಸುತ್ತಿದ್ದ ಹಂತಕನೊಬ್ಬ ಈ ದಾಳಿಗೆ ಪ್ರಯತ್ನಿಸಿದ್ದನೆಂದು ವರದಿಯಾಗಿತ್ತು. ಬಳಿಕ ಮನಮೋಹನ್ ಶೆಟ್ಟಿ ಅವರು ಶಸ್ತ್ರಸಜ್ಜಿತ ಅಂಗರಕ್ಷಕರನ್ನು ನೇಮಿಸಿಕೊಂಡು, ಕಚೇರಿಗೆ ಬರುವವರ ಮೇಲೆ ನಿಗಾ ಇಡಲು ಸಿಸಿಟಿವಿ ಕ್ಯಾಮೆರಾಗಳ ವ್ಯವಸ್ಥೆ ಮಾಡಿದ್ದರು.
2000ರ ಜನವರಿ 21ರಂದು ನಿರ್ದೇಶಕ, ನಟ ಹಾಗೂ ನಿರ್ಮಾಪಕ ರಾಕೇಶ್ ರೋಷನ್ ಅವರ ಮೇಲೆ ಸಾಂತಾಕ್ರೂಜ್ ಪಶ್ಚಿಮದಲ್ಲಿರುವ ಕಚೇರಿಯ ಹೊರಗೆ ಗುಂಡಿನ ದಾಳಿ ನಡೆಯಿತು. ಅವರ ಪುತ್ರ ಹೃತಿಕ್ ರೋಷನ್ ನಟನೆಯ ‘ಕಹೋ ನಾ… ಪ್ಯಾರ್ ಹೈ’ ಚಿತ್ರದ ಯಶಸ್ಸಿನ ಬೆನ್ನಲ್ಲೇ ಈ ಘಟನೆ ನಡೆದಿತ್ತು. ದಾಳಿಯಲ್ಲಿ ಒಂದು ಗುಂಡು ಅವರ ತೋಳಿಗೆ ತಗುಲಿದರೆ, ಮತ್ತೊಂದು ಗುಂಡು ಎದೆಯನ್ನು ಸವರಿಕೊಂಡು ಹೋಗಿತ್ತು. ಚಿಕಿತ್ಸೆ ಬಳಿಕ ಅವರು ಚೇತರಿಸಿಕೊಂಡರು.
ಭೂಗತ ಲೋಕದೊಂದಿಗೆ ಸಂಪರ್ಕ ಹೊಂದಿದ್ದವರು ಹಣಕಾಸು ಒದಗಿಸಲಿರುವ ಚಿತ್ರದಲ್ಲಿ ಹೃತಿಕ್ ರೋಷನ್ ನಟಿಸಬೇಕೆಂಬ ಒತ್ತಡವಿತ್ತು ಮತ್ತು ಚಿತ್ರೀಕರಣದ ದಿನಾಂಕಗಳನ್ನು ಬದಲಾಯಿಸುವ ಬೇಡಿಕೆಯನ್ನು ತಿರಸ್ಕರಿಸಿದ್ದೇ ದಾಳಿಗೆ ಕಾರಣವಾಯಿತು ಎಂದು ರಾಕೇಶ್ ರೋಷನ್ ನಂತರದ ಸಂದರ್ಶನಗಳಲ್ಲಿ ಹೇಳಿದ್ದರು. 2026ರ ಏಪ್ರಿಲ್‌ನಲ್ಲಿ ನಿರ್ದೇಶಕ ರಾಮ್ ಗೋಪಾಲ್ ವರ್ಮಾ ಕೂಡ ಛೋಟಾ ಶಕೀಲ್ ಜಾಲದ ಒತ್ತಡಕ್ಕೆ ಮಣಿಯದ ಹಿನ್ನೆಲೆಯಲ್ಲಿ ಈ ದಾಳಿ ನಡೆದಿತ್ತು ಎಂಬ ರೀತಿಯ ಹೇಳಿಕೆ ನೀಡಿದ್ದರು.
2001ರ ಫೆಬ್ರವರಿ 14ರಂದು ಹಿಂದಿ ಚಿತ್ರಗಳಲ್ಲಿ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದ ನಟ ಹಾಗೂ ನಿರ್ಮಾಪಕ ದಿನೇಶ್ ಆನಂದ್ ಅವರು ಬೋರಿವಲಿಯ ನ್ಯಾಷನಲ್ ಪಾರ್ಕ್‌ನಲ್ಲಿ ಗುಂಡಿನ ದಾಳಿಗೆ ಬಲಿಯಾದರು. ಅವರು ಹತ್ಯೆಗೀಡಾಗಿದ್ದ ಮುಕೇಶ್ ದುಗ್ಗಲ್ ನಿರ್ಮಿಸಿದ್ದ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದರು.
2002ರ ಜುಲೈನಲ್ಲಿ ‘ಸಾಜನ್’ ಚಿತ್ರದ ನಿರ್ದೇಶಕ ಲಾರೆನ್ಸ್ ಡಿಸೋಜಾ ಅವರ ಮೇಲೆ ಓಶಿವಾರಾದಲ್ಲಿನ ಕಚೇರಿಯ ಹೊರಗೆ ದಾಳಿ ನಡೆಯಿತು. ಇಬ್ಬರು ಬಂದೂಕುಧಾರಿಗಳು ಗುಂಡು ಹಾರಿಸಿದರೂ, ನೇರವಾಗಿ ಅವರನ್ನು ಗುರಿಯಾಗಿಸಿರಲಿಲ್ಲ ಎನ್ನಲಾಗಿದೆ. ಗುಂಡುಗಳ ಪೈಕಿ ಒಂದು ಗಾಳಿಯಲ್ಲಿ ಹಾರಿಸಲ್ಪಟ್ಟರೆ, ಮತ್ತೊಂದು ಕಚೇರಿಯ ಗೇಟ್‌ಗೆ ಮತ್ತು ಇನ್ನೊಂದು ಸಮೀಪದ ಕಟ್ಟಡದ ಗೋಡೆಗೆ ತಗುಲಿತ್ತು. ಇಜಾಜ್ ಲಕ್ಡಾವಾಲಾ ಗ್ಯಾಂಗ್‌ಗೆ ಸುಲಿಗೆ ಹಣ ನೀಡುವಂತೆ ಚಿತ್ರರಂಗವನ್ನು ಬೆದರಿಸುವ ಉದ್ದೇಶದಿಂದ ಈ ದಾಳಿ ನಡೆದಿರಬಹುದೆಂದು ಪೊಲೀಸರು ಶಂಕಿಸಿದ್ದರು. ಲಾರೆನ್ಸ್ ಡಿಸೋಜಾ ಅವರಿಗೆ ದೂರವಾಣಿ ಮೂಲಕ ಹಣಕ್ಕಾಗಿ ಬೆದರಿಕೆಗಳು ಬಂದಿದ್ದವು ಎನ್ನಲಾಗಿದೆ.
ಇತ್ತೀಚಿನ ವರ್ಷಗಳಲ್ಲಿಯೂ ಚಿತ್ರರಂಗದ ಗಣ್ಯರ ನಿವಾಸಗಳ ಮೇಲೆ ಗುಂಡಿನ ದಾಳಿಗಳು ಮುಂದುವರಿದಿವೆ. 2024ರ ಏಪ್ರಿಲ್ 14ರಂದು ಬಾಂದ್ರಾದಲ್ಲಿರುವ ನಟ ಸಲ್ಮಾನ್ ಖಾನ್ ಅವರ ನಿವಾಸದ ಹೊರಗೆ ಮೋಟಾರ್‌ಸೈಕಲ್‌ನಲ್ಲಿ ಬಂದ ಇಬ್ಬರು ದುಷ್ಕರ್ಮಿಗಳು ಹಲವು ಸುತ್ತು ಗುಂಡು ಹಾರಿಸಿದ್ದರು. ಸಲ್ಮಾನ್ ಖಾನ್ ಗಾಯಗೊಳ್ಳದೆ ಪಾರಾಗಿದ್ದರು. ಜೈಲಿನಲ್ಲಿರುವ ಗ್ಯಾಂಗ್‌ಸ್ಟರ್ ಲಾರೆನ್ಸ್ ಬಿಷ್ಣೋಯ್ ಸೂಚನೆಯ ಮೇರೆಗೆ ದಾಳಿ ನಡೆದಿದೆ ಎಂದು ಮುಂಬೈ ಪೊಲೀಸರು ಆರೋಪಿಸಿದ್ದರು. ಈ ಪ್ರಕರಣದಲ್ಲಿ ಆರು ಆರೋಪಿಗಳ ವಿರುದ್ಧ ಮಹಾರಾಷ್ಟ್ರ ಸಂಘಟಿತ ಅಪರಾಧ ನಿಯಂತ್ರಣ ಕಾಯ್ದೆಯಡಿ ಆರೋಪಪಟ್ಟಿ ಸಲ್ಲಿಸಲಾಗಿತ್ತು.
2025ರ ಸೆಪ್ಟೆಂಬರ್‌ನಲ್ಲಿ ಉತ್ತರ ಪ್ರದೇಶದ ಬರೇಲಿಯಲ್ಲಿರುವ ನಟಿ ದಿಶಾ ಪಟಾನಿ ಅವರ ಕುಟುಂಬದ ಮನೆಯ ಹೊರಗೂ ಗುಂಡಿನ ದಾಳಿ ನಡೆದಿತ್ತು. 2026ರ ಫೆಬ್ರವರಿ 1ರಂದು ಜುಹುವಿನಲ್ಲಿರುವ ನಿರ್ದೇಶಕ ರೋಹಿತ್ ಶೆಟ್ಟಿ ಅವರ ನಿವಾಸದ ಹೊರಗೆ ದುಷ್ಕರ್ಮಿಗಳು ಗುಂಡು ಹಾರಿಸಿದ್ದರು. ಈ ಪ್ರಕರಣದಲ್ಲಿ ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್‌ಗೆ ಸಂಬಂಧಿಸಿದ ಗುಂಪೊಂದು ತನ್ನ ಪ್ರಾಬಲ್ಯ ಸ್ಥಾಪಿಸಲು ದಾಳಿ ನಡೆಸಿದೆ ಎಂದು ಆರೋಪಿಸಿ, ಏಪ್ರಿಲ್‌ನಲ್ಲಿ ಮುಂಬೈ ಪೊಲೀಸರು 17 ಆರೋಪಿಗಳ ವಿರುದ್ಧ ಆರೋಪಪಟ್ಟಿ ಸಲ್ಲಿಸಿದ್ದರು. ಆದರೆ ರೋಹಿತ್ ಶೆಟ್ಟಿ ಅವರನ್ನೇ ಗುರಿಯಾಗಿಸಲು ನಿಖರ ಕಾರಣವೇನು ಎಂಬುದು ಸ್ಪಷ್ಟವಾಗಿರಲಿಲ್ಲ.
ಇದೀಗ ಟೈಗರ್ ಶ್ರಾಫ್ ಅವರ ಮೇಲೆ ನಡೆದಿರುವುದಾಗಿ ವರದಿಯಾದ ಗುಂಡಿನ ದಾಳಿ, ಬಾಲಿವುಡ್ ಮತ್ತು ಸಂಘಟಿತ ಅಪರಾಧ ಜಾಲಗಳ ನಡುವಿನ ಹಳೆಯ ಸಂಘರ್ಷದ ನೆನಪುಗಳನ್ನು ಮತ್ತೆ ಕೆದಕಿದೆ. ಚಿತ್ರರಂಗದ ಗಣ್ಯರನ್ನು ಬೆದರಿಸುವುದು, ಸುಲಿಗೆಗೆ ಒತ್ತಾಯಿಸುವುದು ಹಾಗೂ ತಮ್ಮ ಪ್ರಭಾವವನ್ನು ಸ್ಥಾಪಿಸಲು ಹಿಂಸಾಚಾರ ಬಳಸುವ ಪ್ರವೃತ್ತಿ ಕಾಲ ಬದಲಾದರೂ ಸಂಪೂರ್ಣವಾಗಿ ಅಂತ್ಯಗೊಂಡಿಲ್ಲ ಎಂಬ ಆತಂಕಕ್ಕೆ ಈ ಘಟನೆ ಕಾರಣವಾಗಿದೆ.
