ಮುಂಬೈನ ಲೋಕಮಾನ್ಯ ತಿಲಕ್ ಟರ್ಮಿನಸ್ (LTT) ರೈಲ್ವೆ ಯಾರ್ಡ್ನಲ್ಲಿ ತುರ್ತು ನಿರ್ವಹಣಾ ಕಾರ್ಯ ನಡೆಯುತ್ತಿರುವ ಹಿನ್ನೆಲೆಯಲ್ಲಿ, ಕರ್ನಾಟಕ ಮತ್ತು ಕೇರಳದಿಂದ ಮುಂಬೈಗೆ ಸಂಚರಿಸುವ ಪ್ರಮುಖ ರೈಲುಗಳ ಸೇವೆಯಲ್ಲಿ ಜನವರಿ ತಿಂಗಳ ಪೂರ್ತಿ ಬದಲಾವಣೆ ಮಾಡಲಾಗಿದೆ ಎಂದು ಕೇಂದ್ರ ರೈಲ್ವೆ ಇಲಾಖೆ ತಿಳಿಸಿದೆ.
ಲೋಕಮಾನ್ಯ ತಿಲಕ್ ಟರ್ಮಿನಸ್ನ ಪಿಟ್ ಲೈನ್ ಸಂಖ್ಯೆ 03ರ ದುರಸ್ತಿ ಕಾರ್ಯಕ್ಕಾಗಿ 2026ರ ಜನವರಿ 1 ರಿಂದ ಜನವರಿ 30 ರವರೆಗೆ 30 ದಿನಗಳ ಕಾಲ ಸಂಚಾರ ನಿರ್ಬಂಧ (Traffic Block) ವಿಧಿಸಲಾಗಿದೆ. ಈ ಕಾರಣದಿಂದಾಗಿ ಮಂಗಳೂರು ಮತ್ತು ಕೇರಳ ಭಾಗದಿಂದ ಬರುವ ರೈಲುಗಳನ್ನು ಪನ್ವೇಲ್ ನಿಲ್ದಾಣದಲ್ಲೇ ಸ್ಥಗಿತಗೊಳಿಸಲು (Short Terminate) ಮತ್ತು ಅಲ್ಲಿಂದಲೇ ಮರಳಿ ಆರಂಭಿಸಲು (Short Originate) ನಿರ್ಧರಿಸಲಾಗಿದೆ.
ಪನ್ವೇಲ್ನಲ್ಲಿ ಮುಕ್ತಾಯಗೊಳ್ಳುವ ರೈಲುಗಳು :
ನೇತ್ರಾವತಿ ಎಕ್ಸ್ಪ್ರೆಸ್ (ರೈಲು ಸಂಖ್ಯೆ 16346): ತಿರುವನಂತಪುರಂನಿಂದ ಮುಂಬೈಗೆ ಬರುವ ಈ ರೈಲು ಡಿಸೆಂಬರ್ 31, 2025 ರಿಂದ ಜನವರಿ 29, 2026 ರವರೆಗೆ ಪನ್ವೇಲ್ ನಿಲ್ದಾಣದಲ್ಲಿ ತನ್ನ ಪ್ರಯಾಣ ಮುಕ್ತಾಯಗೊಳಿಸಲಿದೆ. ಪನ್ವೇಲ್ ಮತ್ತು LTT ನಡುವೆ ಈ ರೈಲು ಸಂಚರಿಸುವುದಿಲ್ಲ.
ಮತ್ಸ್ಯಗಂಧ ಎಕ್ಸ್ಪ್ರೆಸ್ (ರೈಲು ಸಂಖ್ಯೆ 12620): ಮಂಗಳೂರಿನಿಂದ ಹೊರಡುವ ಈ ದೈನಂದಿನ ರೈಲು ಡಿಸೆಂಬರ್ 31, 2025 ರಿಂದ ಜನವರಿ 29, 2026 ರವರೆಗೆ ಪನ್ವೇಲ್ ನಿಲ್ದಾಣದವರೆಗೆ ಮಾತ್ರ ಸಂಚರಿಸಲಿದೆ.
2. ಪನ್ವೇಲ್ನಿಂದಲೇ ಆರಂಭವಾಗುವ ರೈಲುಗಳು:
ನೇತ್ರಾವತಿ ಎಕ್ಸ್ಪ್ರೆಸ್ (ರೈಲು ಸಂಖ್ಯೆ 16345): ಮುಂಬೈನಿಂದ ಹೊರಡಬೇಕಾದ ಈ ರೈಲು ಜನವರಿ 2, 2026 ರಿಂದ ಜನವರಿ 31, 2026 ರವರೆಗೆ LTT ಬದಲಿಗೆ ಪನ್ವೇಲ್ ನಿಲ್ದಾಣದಿಂದಲೇ ತನ್ನ ಪ್ರಯಾಣ ಆರಂಭಿಸಲಿದೆ.
ಮತ್ಸ್ಯಗಂಧ ಎಕ್ಸ್ಪ್ರೆಸ್ (ರೈಲು ಸಂಖ್ಯೆ 12619): ಈ ರೈಲು ಜನವರಿ 1, 2026 ರಿಂದ ಜನವರಿ 31, 2026 ರವರೆಗೆ ಲೋಕಮಾನ್ಯ ತಿಲಕ್ ಟರ್ಮಿನಸ್ ಬದಲಿಗೆ ಪನ್ವೇಲ್ ನಿಲ್ದಾಣದಿಂದಲೇ ನಿಗದಿತ ಸಮಯಕ್ಕೆ ಮಂಗಳೂರಿನತ್ತ ಪ್ರಯಾಣ ಬೆಳೆಸಲಿದೆ.
ಈ ಬದಲಾವಣೆಯಿಂದಾಗಿ ಮುಂಬೈ ನಗರದ ಕೇಂದ್ರ ಭಾಗಕ್ಕೆ ತೆರಳುವ ಪ್ರಯಾಣಿಕರು ಪನ್ವೇಲ್ನಿಂದ ಉಪನಗರ ರೈಲುಗಳನ್ನು (Local Trains) ಅವಲಂಬಿಸಬೇಕಾಗುತ್ತದೆ. ನಿರ್ವಹಣಾ ಕಾರ್ಯದಿಂದ ಪ್ರಯಾಣಿಕರಿಗೆ ಉಂಟಾಗುವ ಅನಾನುಕೂಲಕ್ಕೆ ಕೇಂದ್ರ ರೈಲ್ವೆಯ ಮುಖ್ಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಸುನಿಲ್ ಬಿ. ನರಕರ್ ಅವರು ವಿಷಾದ ವ್ಯಕ್ತಪಡಿಸಿದ್ದಾರೆ.
