ಸಂಘೊದ ಬುಲೆಚ್ಚಿಲ್ದ ಒಟ್ಟುಗು ಬಿರ್ದಾದ ಬಾಸೆ, ಸಂಸ್ಕೃತಿ, ಆಚಾರ-ವಿಚಾರೊನು ಒರಿಪಾದ್ ಬುಲೆಪಾವೊಡು – ರಘು ಎ. ಮೂಲ್ಯ ಪಾದೆಬೆಟ್ಟು
ಮುಂಬಯಿ: ತುಳು ಬಾಸೆ, ಸಂಸ್ಕೃತಿ, ಸಂಸ್ಕಾರೊಗು ನಮ್ಮ ದೇಸೊಡು ಮಾತ್ರ ಅತ್ತ್, ಪರದೇಸೊಡುಲಾ ಮಲ್ಲ ಬಿಲೆ ಉಂಡು. ಸರ್ಕಾರೊಲಾ ತುಳು ಬಾಸೆಗ್ ಮನ್ನಣೆ ಕೊರ್ತುಂಡು. ಸಂಘೊದ ಬುಲೆಚ್ಚಿಲ್ದ ಒಟ್ಟುಗು ಇಂಚಿತ್ತಿ ತುಳು ಬಾಸೆ, ಸಂಸ್ಕೃತಿ, ಸಂಸ್ಕಾರೊನು ಒರಿಪಾದ್ ಬುಲೆಪಾವೊಡು ಪಂಡ್ದ್ ಕುಲಾಲ ಸಂಘ ಮುಂಬಯಿದ ಅಧ್ಯಕ್ಷೆರಾಯಿನ ರಘು ಎ. ಮೂಲ್ಯ ಪಾದೆಬೆಟ್ಟು ಪಂಡೆರ್.
ಕುಲಾಲ ಸಂಘ ಮುಂಬಯಿದ ಪೊಂಜೊವುಲೆನ ವಿಭಾಗೊದ ವತಿಯಿರ್ದ್ “ನಮ್ಮ ಸಂಸ್ಕೃತಿ – ತುಳುವೆರೆ ಆಯನ” ಸಾಂಸ್ಕೃತಿಕ ಲೇಸ್ ಸೆಪ್ಟೆಂಬರ್ 20 ಕ್ಕ್ ದಾದರ್ ಮೂಡಾಯಿದ ಹಿಂದೂ ಕಾಲೋನಿಡ್ ಇಪ್ಪುನ ಬಿ. ಎನ್. ವೈದ್ಯ ಸಭಾಭವನೊಡು (ಕಿಂಗ್ ಜಾರ್ಜ್ ಆಡಿಟೋರಿಯಂ) ನಡತ್ತ್ಂಡ್. ಸಭೆತ್ತ ಗುರ್ಕಾರ್ಮೆ ವಹಿಸಾದ್ ಪಾತೆರಿನ ಆರ್, “ತುಳುನಾಡ್ದ ಬಿರ್ದಾದ ಸಂಸ್ಕೃತಿ, ಆಚಾರ-ವಿಚಾರ, ಪರಂಪರೆ ಬೊಕ್ಕ ಬದ್ಕ್ದ ಸಾದಿನ್ ದುಂಬುದ ತರೆಮಾರ್ಗ್ ತೆರಿಪಾವುನೆಟ್ ಇಂಚಿತ್ತಿ ಲೇಸ್ಲೆನ ಪಾತ್ರ ಮಲ್ಲವುಂಡು. ಸಂಘೊದ ಬೇಲೆಲೆಡ್ ಜವನೆರ್ ಎಚ್ಚಾದ್ ಪಾಲ್ ಪಡೆವೊಡು. ಪೊಂಜೊವುಲು ಇಂಚನೆ ಒಗ್ಗಟ್ಟ್ಡ್ ದುಂಬು ಪೋವೊಡು. ಪೊಂಜೊವುಲೆನ ವಿಭಾಗ ಮಾಲ್ತಿನ ಈ ಲೇಸ್ ತುಳುವೆರೆನ ಸಾಂಸ್ಕೃತಿಕ ಸಿರಿನ್ ತೋಜಾವುನೆತ್ತ ಒಟ್ಟುಗು ಸಂಘೊದ ಸದಸ್ಯೆರೆಡ್ ಒಗ್ಗಟ್ಟು ಬೊಕ್ಕ ಸಾಂಸ್ಕೃತಿಕ ಅಭಿಮಾನೊನು ಎಚ್ಚ ಮಲ್ಪುನೆಕ್ ಆಸರೆ ಆತ್ಂಡ್” ಪಂಡ್ದ್ ಪುಗರಿಯೆರ್.
ಸಂಘೊದ ಪೊಂಜೊವುಲೆನ ವಿಭಾಗೊದ ಕಾರ್ಯಾಧ್ಯಕ್ಷೆ ಸುಚಿತಾ ಡಿ. ಬಂಜನ್ ಪಾತೆರ್ದ್, “ಸಂಸ್ಕೃತಿ ಪಂಡ ಬರೀ ಆಚರಣೆ ಅತ್ತ್; ಸಂಸ್ಕೃತಿ ಪಂಡ ನಮ್ಮ ಬದ್ಕ್ದ ನಡವಳಿಕೆ. ಸಂಸ್ಕೃತಿ ನಮ್ಮ ಮೂಲ ಬೇರ್ ಬೊಕ್ಕ ನಮ್ಮ ಗುರ್ತ. ಗೋಮಾತೆ, ಭಾರತ ಮಾತೆ ಪಂಡ್ದ್ ಪೂಜೆ ಮಲ್ಪುನ ಭಾರತೊದ ಸಂಸ್ಕೃತಿಡ್ ಪೊಂಜೊವುಲೆಗ್ ಎಡ್ಡೆ ಮಾನ-ಮನಾದಿಗೆ ಉಂಡು. ಪೊಂಜೊವುಲು ಇಡೀ ಸಮಾಜೊದ ಮುಕ್ಕನ್ನಿ (ಕನ್ನಡಿ) ಆದುಲ್ಲೆರ್. ನಮ್ಮ ಸಂಸ್ಕೃತಿ-ಪರಂಪರೆನ್ ಒರಿಪಾದ್ ಬುಲೆಪಾವುನೆಟ್ ಪೊಂಜೊವುಲೆನ ಪಾತ್ರ ಮಲ್ಲವುಂಡು. ನಾವೆಲ್ಲೆರ್ಲಾ ಒಂಜಾದ್ ನಮ್ಮ ಸಂಸ್ಕೃತಿನ್ ಆಚರಣೆ ಮಲ್ತ್ದ್, ದುಂಬುದ ಪೀಳಿಗೆಗ್ ಪರಿಚಯ ಮಲ್ಪೊಡು” ಎಂದೆರ್.
ಮುಖ್ಯ ಬಿನ್ನವೆರಾದ್ ಬತ್ತಿನ ಬಂಟರ ಸಂಘ ಮುಂಬಯಿದ ಪೊಂಜೊವುಲೆನ ವಿಭಾಗೊದ ಕಾರ್ಯಾಧ್ಯಕ್ಷೆ ಚಿತ್ರಾ ರವಿರಾಜ್ ಶೆಟ್ಟಿ ಪಾತೆರ್ದ್, “ನಂಕ್ ಮಲ್ತಿನ ಎದ್ಕೊಣುನು ತೂನಗ ನಿಜವಾದ್ಲಾ ಮುಲ್ಪ ಸಂಸ್ಕೃತಿ ಪರ್ಬಿದ್ ತೋಜುಂಡು. ನಮ ಓಲೆ ಇತ್ತೆರ್ಲಾ ನಮ್ಮ ಮೂಲ ಬೇರ್ ನಮ್ಮ ಊರುಡೇ ಉಂಡು. ಅಂಚಾದ್ ತುಳು ಬಾಸೆಗ್ ಪ್ರಾಮುಖ್ಯತೆ ಕೊರೋಡು ಬೊಕ್ಕ ತುಳು ಲಿಪಿನ್ ಕಲ್ತೊನೊಡು. ಬದಲಾವಣೆ ಆಪಿನ ಈ ಪೊರ್ತುಡು ಅಪ್ಪೆಲ್ಲೆರ್ ಜೋಕ್ಲೆಗ್ ನಾಡ್ದ ಬಾಸೆ, ಸಂಸ್ಕೃತಿ ಬೊಕ್ಕ ಸಂಸ್ಕಾರೊನು ಕಲ್ಪಾವುನ ಅಗತ್ಯ ಉಂಡು” ಪಂಡೆರ್.
ಕುಡೊರಿ ಮುಖ್ಯ ಬಿನ್ನವೆರ್, ಸಮಾಜ ಸೇವಕಿ ಪ್ರಿಯದರ್ಶಿನಿ ಸುನಿಲ್ ಕುಲಾಲ್ ಪಾತೆರ್ದ್, “ಕುಲಾಲ ಸಂಘ ಮುಂಬಯಿದ ಪೊಂಜೊವುಲೆನ ವಿಭಾಗೊದ ಮುಖಾಂತರ ನಾಡ್ದ ಬಾಸೆ ಬೊಕ್ಕ ಸಂಸ್ಕೃತಿನ್ ಒರಿಪಾದ್ ಬುಲೆಪಾವುನ ಬೇಲೆ ನಡತೊಂದು ಉಪ್ಪುನೆ ಬಾರಿ ಎಡ್ಡೆ ವಿಚಾರ. ತುಳುವೆರ್ ಓಲೆ ಇತ್ತೆರ್ಲಾ ತನ್ಕುಲೆನ ಬಿರ್ದ್ ಬೊಕ್ಕ ಸಾದನೆದ ಮುಖಾಂತರ ಮಾತ ರಂಗೊಡುಲಾ ದುಂಬಿಪ್ಪುವೆರ್. ಮಸ್ತ್ ಕಾಲೊದ ಕನಸಾದಿತ್ತಿನ ತುಳು ಬಾಸೆಗ್ ಸರ್ಕಾರ ಪ್ರಾಮುಖ್ಯತೆ ಕೊರ್ತಿನೆಕ್ ಅಭಿನಂದನೆ ಸಲ್ಲಿಸೊಡು” ಎಂದೆರ್.
ಸಮಾಜ ಸೇವಕಿ ನಮ್ರತಾ ಜಗದೀಶ್ ಬಂಜನ್ ಪಾತೆರ್ದ್, “ಈ ಲೇಸ್ಡ್ ಪಾಲ್ ಪಡೆರೆ ಎಂಕ್ ಅವಕಾಸ ತಿಕ್ಕಿನೆಕ್ ಯಾನ್ ಪುಣ್ಯವಂತೆ. ನಮ್ಮ ನಾಡ್ದ ಸಂಸ್ಕೃತಿ, ಪರಂಪರೆ ಬೊಕ್ಕ ಆಚಾರ-ವಿಚಾರೊಲೆನ್ ನಮ್ಮನೆ ಒರಿಪಾವೊಡು. ಇಂಚಿತ್ತಿ ಪೊರ್ಲುದ ಬೊಕ್ಕ ಅರ್ತಪೂರ್ಣವಾಯಿನ ಲೇಸ್ಲೆನ್ ಮಾಲ್ಪುನ ಕುಲಾಲ ಸಂಘೊದ ಪೊಂಜೊವುಲೆನ ವಿಭಾಗೊಗು ಎನ್ನ ಬೆಂಬಲ ಎಪೊಲಾ ಉಂಡು” ಪಂಡೆರ್.
ಬಿನ್ನವೆರಾದ್ ಬತ್ತಿನ ಸಮಾಜ ಸೇವಕಿ ದೇವಕಿ ಸುನಿಲ್ ಸಾಲಿಯಾನ್ ಪಾತೆರ್ದ್ ಲೇಸ್ಗ್ ಎಡ್ಡೆಪ್ಪು ಬಯಕೆಯೆರ್.
ದಾನಿ ಡಾ. ಸುರೇಖಾ ರತನ್ ಕುಲಾಲ್ ತನ್ಕುಲೆನ ಅನಿಸಿಕೆನ್ ಪಂಡೊಂದು, “ನಮ್ಮ ಪಿರಿಯೆರ್ ನಂಕ್ ಕಲ್ಪಾದ್ ಕೊರ್ತಿನ ಸಂಸ್ಕೃತಿ ಬೊಕ್ಕ ಸಂಸ್ಕಾರ ನಮೊನ ನಡಕೆ-ನುಡಿಟ್ ತೋಜುಂಡು. ನಮ್ಮ ವಣಸ್ದ ಕ್ರಮೊಲಾ ನಮ್ಮ ಸಂಸ್ಕೃತಿದ ಗುರ್ತ. ಪ್ರತಿಯೊಂಜಿ ಸಂಸ್ಕೃತಿದ ಪಿರವುಡು ಒಂಜಿ ಸಂಸ್ಕಾರ ಉಂಡು. ಇಂಚಿತ್ತಿ ಬಿಲೆಬಾಳುವ ಸಂಸ್ಕೃತಿನ್ ಒರಿಪಾದ್, ದುಂಬುದ ಜೋಕ್ಲೆಗ್ ಪರಿಚಯ ಮಲ್ಪುನೆ ನಮ್ಮ ಮಾತೆರೆನ ಕಜ್ಜ” ಎಂದೆರ್.
ಮುಖ್ಯ ಪಾತೆರೊಕಾರ್ತಿಯಾದ್ ಬತ್ತಿನ ಚಿಣ್ಣರ ಬಿಂಬ ಟ್ರಸ್ಟ್ದ ಮುಖ್ಯ ಸಮನ್ವಯಕಿ ಗೀತಾ ರಘುರಾಮ ಹೇರಳ ತುಳು ಸಂಸ್ಕೃತಿದ ಬಗೆಟ್ ಪಾತೆರ್ದ್, “ತುಳು ಸಂಸ್ಕೃತಿಗ್ ಸಾವಿರ ವರ್ಸೊಲೆನ ಇತಿಹಾಸ ಉಂಡು. ನಮ್ಮ ಇಲ್ಲದ ಪಿರಿಯೆರೆರ್ದ್ ಸಂಸ್ಕೃತಿದ ಬಗೆಟ್ ನಮ ತೆರಿಯೊಂದೊ. ತುಳುವೆರೆಗ್ ಎಡ್ಡೆ ಸಂಸ್ಕೃತಿ-ಸಂಸ್ಕಾರ ಉಂಡು. ತುಳು ಸಂಸ್ಕೃತಿಗ್ ದೇಸೊಡೆ ಮಲ್ಲ ಬಿಲೆ ಉಂಡು. ಪಿರಿಯೆರೆನ್ ಗೌರವ ಮಲ್ಪುನೆ ಸಂಸ್ಕೃತಿದ ಒಂಜಿ ಬಾಗ. ಪೊಂಜೊವುಲು ಜೋಕ್ಲೆಗ್ ಸಂಸ್ಕೃತಿದ ಬಗೆಟ್ ತೆರಿಪುನ ಕೆಲಸ ಮಲ್ಪೊಡು. ಊರುದ ನಮ್ಮ ದೈವ-ದೇವೆರೆನ ಬಗೆಟ್ ಜೋಕ್ಲೆಗ್ ತೆರಿಕೆ ಆವೊಡು. ಜೋಕುಲು ದೇಸೊದ ಮಲ್ಲ ಸಕ್ತಿ” ಪಂಡ್ದ್ ಸಂಸ್ಕೃತಿದ ಬಗೆಟ್ ವಿವರ ಕೊರಿಯೆರ್.
ಕುಲಾಲ ಸಂಘ ಮುಂಬಯಿದ ಗೌರವ ಪ್ರಧಾನ ಕಾರ್ಯದರ್ಶಿ ಕರುಣಾಕರ ಸಾಲ್ಯಾನ್ ಸಂಘೊದ ಬೇಲೆಲೆನ ಬಗೆಟ್ ಮಾಹಿತಿ ಕೊರಿಯೆರ್.
ಈ ಪೊರ್ತುಡು ಪೊಂಜೊವುಲೆನ ವಿಭಾಗೊದ ದುಂಬುದ ಕಾರ್ಯಾಧ್ಯಕ್ಷೆರಾಯಿನ ಸುಮತಿ ಬಂಜನ್ ಬೊಕ್ಕ ಮಮತಾ ಗುಜರನ್ ಮೆರೆನ್ ವೇದಿಕೆಡಿತ್ತಿನ ಬಿನ್ನವೆರ್ ಸನ್ಮಾನ ಮಲ್ತೆರ್. ರತ್ನಾ ಡಿ. ಕುಲಾಲ್ ಸನ್ಮಾನಿತೆರೆನ್ ಪರಿಚಯ ಮಲ್ತೆರ್. ದಾನಿಲೆನ್, ಪೊಂಜೊವುಲೆನ ವಿಭಾಗೊದ ಮಾತ ಪದಾಧಿಕಾರಿಲೆನ್, ಪ್ರಾದೇಶಿಕ ಸಮಿತಿಲೆನ ಪೊಂಜೊವುಲೆನ ವಿಭಾಗೊದ ಕಾರ್ಯಾಧ್ಯಕ್ಷೆರೆನ್ ಬೊಕ್ಕ ಕಾರ್ಯಕಾರಿ ಸಮಿತಿ, ಉಪಸಮಿತಿಲೆನ ಸದಸ್ಯೆರೆನ್ ಮಾನಾದಿಗೆ ಮಲ್ತೆರ್.
ವೇದಿಕೆಡಿತ್ತಿನ ಬಿನ್ನವೆರ್ ದೀಪ ಪೊತ್ತಾದ್ ಪಿಂಗಾರ ಅರಳಿಸಾದ್ ಸಭಾ ಕಜ್ಜೊಗು ಚಾಲನೆ ಕೊರಿಯೆರ್. ಪ್ರಣಿತಾ ಪ್ರಾರ್ಥನೆ ಮಲ್ತೆರ್. ಕಾರ್ಯದರ್ಶಿ ನಯನಾ ಎನ್. ಬಂಗೇರ ಎದ್ಕೊನಿಯೆರ್. ಲೇಸ್ನ್ ಕೃಪಾ ಜಗದೀಶ್ ಮೂಲ್ಯ ಬೊಕ್ಕ ಪ್ರತೀಕ್ಷಾ ಸೌರಭ್ ಬಂಗೇರ ನಡಪಾದ್ ಕೊರಿಯೆರ್. ಕೋಶಾಧಿಕಾರಿ ಲತಾ ಎಸ್. ಮೂಲ್ಯ ಸೊಲ್ಮೆ ಸಂದಾಯೆರ್.
ಕಾಂಡೆ ಪೊಂಜೊವುಲೆನ ಸದಸ್ಯೆರೆರ್ದ್ ಮಂಜೊಲು-ಕುಂಕುಮ ಕಜ್ಜ ನಡತ್ಂಡ್.
ವೇದಿಕೆಡ್ ಕುಲಾಲ ಸಂಘ ಮುಂಬಯಿದ ಪೊಂಜೊವುಲೆನ ವಿಭಾಗೊದ ಮಾತ ಪದಾಧಿಕಾರಿಲು ಅತ್ತಂದೆ ಪ್ರಾದೇಶಿಕ ಸಮಿತಿಲೆನ ಪೊಂಜೊವುಲೆನ ವಿಭಾಗೊದ ಕಾರ್ಯಾಧ್ಯಕ್ಷೆರಾಯಿನ ರತ್ನಾ ಡಿ. ಕುಲಾಲ್, ರೇಣುಕಾ ಎಸ್. ಸಾಲ್ಯಾನ್, ಕುಶಲಾ ಜಿ. ಬಂಗೇರ, ಬೇಬಿ ವಿ. ಬಂಗೇರ ಬೊಕ್ಕ ಇಂದಿರಾ ಆರ್. ಬಂಜನ್ ಇತ್ತೆರ್.
ಕುಲಾಲ ಸಂಘೊದ ಗೌರವ ಅಧ್ಯಕ್ಷೆ ಪಿ. ದೇವದಾಸ್ ಎಲ್. ಕುಲಾಲ್, ಉಪಾಧ್ಯಕ್ಷೆ ಡಿ.ಐ. ಮೂಲ್ಯ, ಪ್ರಧಾನ ಕಾರ್ಯದರ್ಶಿ ಕರುಣಾಕರ ಬಿ. ಸಾಲಿಯಾನ್, ಕೋಶಾಧಿಕಾರಿ ಜಯ ಎಸ್. ಅಂಚನ್, ಜೊತೆ ಕಾರ್ಯದರ್ಶಿಲೆನಾಯಿನ ಲಕ್ಷ್ಮಣ್ ಸಿ. ಮೂಲ್ಯ ಬೊಕ್ಕ ಸುನಿಲ್ ಕೆ. ಕುಲಾಲ್, ಜೊತೆ ಕೋಶಾಧಿಕಾರಿ ರೇಣುಕಾ ಎಸ್. ಸಾಲ್ಯಾನ್, ಪೊಂಜೊವುಲೆನ ವಿಭಾಗೊದ ಉಪ ಕಾರ್ಯಾಧ್ಯಕ್ಷೆ ಕವಿತಾ ಸಿ. ಹಂಡ, ಕಾರ್ಯದರ್ಶಿ ನಯನಾ ಎನ್. ಬಂಗೇರ, ಕೋಶಾಧಿಕಾರಿ ಲತಾ ಎಸ್. ಮೂಲ್ಯ, ಜೊತೆ ಕಾರ್ಯದರ್ಶಿ ಆರತಿ ಕೆ. ಸಾಲ್ಯಾನ್, ಜೊತೆ ಕೋಶಾಧಿಕಾರಿ ಚಂದ್ರಾವತಿ ಎಸ್. ಸಾಲ್ಯಾನ್ ಬೊಕ್ಕ ಮಾತ ಸದಸ್ಯೆರ್, ಕಾರ್ಯಕಾರಿ ಸಮಿತಿ ಅಂಚನೆ ಜವನೆರೆನ ವಿಭಾಗೊದ ಮಾತ ಸದಸ್ಯೆರ್ ಬೆರಿಸಾಯ ಕೊರಿಯೆರ್.
ಲೇಸ್ಡ್ ತುಳುನಾಡ್ದ ಬೇತೆ ಬೇತೆ ಸಾಂಪ್ರದಾಯಿಕ ಕಲೆಕುಲು, ನಲಿಕೆ, ಪದೊಕುಲು ಬೊಕ್ಕ ಸಂಸ್ಕೃತಿನ್ ಬಿಂಬಿಸಾವುನ ನಮೂನೆ ನಮೂನೆದ ಲೇಸ್ಲು ನಡತ್ಂಡ್. ಪೊಂಜೊವುಲು ಬೊಕ್ಕ ಜೋಕುಲು ಉಮೇದ್ಡ್ ಪಾಲ್ ಪಡೆದ್ ಲೇಸ್ಗ್ ಪೊರ್ಲು ಕೊರಿಯೆರ್. ತುಳು ಸಂಸ್ಕೃತಿದ ಸಿರಿನ್ ಸಾರುನ ಪ್ರದರ್ಶನೊಲು ಜನಕುಲೆನ ಮನಸ್ಸ್ ಗೆಂದಿಯೊ.
ಬಯ್ಯಗ್ ‘ನಮ್ಮ ಸಂಸ್ಕೃತಿ’ ಪುದರ್ದಡಿಟ್ ಬೇತೆ ಬೇತೆ ಸಾಂಸ್ಕೃತಿಕ ಕಜ್ಜೊಲು ನಡತ್ಂಡ್. ಐನ್ ಪ್ರಾದೇಶಿಕ ಸಮಿತಿಲೆನ ಪೊಂಜೊವುಲು ಕುಲಾಲ ಸಂಸ್ಕೃತಿನ್ ತೋಜಾವುನ ನಲಿಕೆ ರೂಪಕೊದ ಪಂತೊಡು ಪಾಲ್ ಪಡೆದ್ ತನ್ಕುಲೆನ ಬಿರ್ದ್ನ್ ತೋಜಾಯೆರ್. ನೆತ್ತ ಒಟ್ಟುಗು ತೆಲಿಕೆ, ಪದೊಕುಲು ಬೊಕ್ಕ ಬೇತೆ ಮನರಂಜನೆದ ಲೇಸ್ಲು ಜನಕುಲೆನ್ ಖುಷಿಪಡಿಸಾಯೊ. ಕಡೆಕ್ ಪಂತೊಲೆಡ್ ಗೆಂದಿನಕುಲೆಗ್ ಇನಾಮು ಪಟ್ಯೆರ್.
ಮಾನಾದಿಗೆ ಪಡೆತಿನಕುಲೆನ ಪಾತೆರ:-
“ಪನ್ನೆರಡು ವರ್ಸೊಗು ದುಂಬು ಯಾನ್ ಪೊಂಜೊವುಲೆನ ವಿಭಾಗೊಡು ಕಾರ್ಯಾಧ್ಯಕ್ಷೆಯಾದ್ ಬೇಲೆ ಮಲ್ತಿನೆನ್ ಇತ್ತೆ ನೆನೆಪು ಮಲ್ತ್ದ್ ಮಾನಾದಿಗೆ ಮಲ್ತಿನೆಕ್ ಸಂಘೊದ ಪೊಂಜೊವುಲೆನ ವಿಭಾಗೊಗು ಸೊಲ್ಮೆಲು. ಎನ್ನ ಎಲ್ಯ ಸೇವೆಡ್ ಕೈಜೋಡಿಸಾಯಿನ ಮಾತ ಪೊಂಜೊವುಲೆಗ್ ಅಭಿನಂದನೆಲು. ಪೊಂಜೊವುಲೆನ ವಿಭಾಗೊದ ಬೇಲೆ ಬಾರಿ ಎಡ್ಡೆ ಆದುಂಡು.” — ಸುಮತಿ ಬಂಜನ್, ಮಾಜಿ ಕಾರ್ಯಾಧ್ಯಕ್ಷೆ
“ಎಂಕ್ ತಿಕ್ಕಿನ ಈ ಸನ್ಮಾನೊಡು ಮಾತ ಪೊಂಜೊವುಲೆನ ಪಾಲ್ ಉಂಡು. ಮಾತೆರೆನ ಬೆರಿಸಾಯೊಡು ಪತ್ತ್ ವರ್ಸ ಸಂಘೊದ ಪೊಂಜೊವುಲೆನ ವಿಭಾಗೊಡು ಸೇವೆ ಮಲ್ತ್ದೆ. ಇತ್ತೆ ಸಂಘೊಡು ಪೊಂಜೊವುಲು ಎಚ್ಚಾದ್ ಕೆಲಸ ಮಲ್ತೊಂದು ದುಂಬು ಬೈದೆರ್. ಜೋಕ್ಲೆನ ಒಟ್ಟುಗು ತುಳು ಪಾತೆರುನೆರ್ದಾತ್ರ ತುಳು ಬಾಸೆನ್ ಒರಿಪಾವೊಲಿ, ಅಂಚನೆ ನಮ್ಮ ಸಂಸ್ಕೃತಿನ್ಲಾ ಒರಿಪಾಯೆರೆ ಸಾದ್ಯ.” — ಮಮತಾ ಗುಜರನ್, ಮಾಜಿ ಕಾರ್ಯಾಧ್ಯಕ್ಷೆ
