ಮುಂಬೈ: ಕುಲಾಲ ಸಂಘ ಮುಂಬೈನ ಕಟ್ಟಡ ನಿರ್ಮಾಣ ಸಮಿತಿಯ ಕಾರ್ಯಾಧ್ಯಕ್ಷ, ಮಹಾದಾನಿ ಸುನಿಲ್ ಸಾಲ್ಯಾನ್ ದಂಪತಿ ವರ್ಷದಲ್ಲಿ ಹಲವಾರು ಬಾರಿ ದೇಶ-ವಿದೇಶಗಳಿಗೆ ಹಿರಿಯ ನಾಗರಿಕರು ಹಾಗೂ ಪ್ರವಾಸಾಸಕ್ತರನ್ನು ಅತಿ ಕಡಿಮೆ ವೆಚ್ಚದಲ್ಲಿ, ಇನ್ನು ಕೆಲವರಿಗೆ ತಮ್ಮ ಸ್ವಂತ ಖರ್ಚಿನಲ್ಲೇ ಪ್ರವಾಸ ಕಲ್ಪಿಸುವ ಯೋಜನೆಯನ್ನು ನಿರಂತರವಾಗಿ ನಡೆಸಿಕೊಂಡು ಬರುತ್ತಿದ್ದಾರೆ.
ಈ ಬಾರಿ ಥೈಲ್ಯಾಂಡ್‌ನ ಬ್ಯಾಂಕಾಕ್ ಮತ್ತು ಪಟ್ಟಾಯ ಪ್ರವಾಸವನ್ನು ಅಕ್ಟೋಬರ್ 7ರಿಂದ 12ರವರೆಗೆ ಆಯೋಜಿಸಲಾಗಿತ್ತು. ಅಲ್ಲಿನ ಪ್ರಸಿದ್ಧ ಬೌದ್ಧ ದೇವಾಲಯಗಳು, ಚಿನ್ನದ ಹೊಳಪಿನ ಅರಮನೆಗಳು, ಆಧುನಿಕ ಕಟ್ಟಡಗಳು, ಚಾವೋ ಫ್ರಯಾ ನದಿಯ ಸೌಂದರ್ಯ ಹಾಗೂ ದೀಪಾಲಂಕಾರದ ರಮಣೀಯ ತಾಣಗಳನ್ನು ಕಣ್ತುಂಬಿಕೊಳ್ಳುವ ಅವಕಾಶವನ್ನು ಕಲ್ಪಿಸಲಾಗಿತ್ತು. ಈ ಪ್ರವಾಸದಲ್ಲಿ ಮುಂಬೈ ಮತ್ತು ಮಂಗಳೂರಿನ ಕುಲಾಲ ಸಮಾಜದ ಹಿರಿಯ ನಾಗರಿಕರು ಹಾಗೂ ಯುವ ಸಮುದಾಯದವರು ಪಾಲ್ಗೊಂಡಿದ್ದರು. ಪ್ರವಾಸಿಗರಿಗೆ ಅತ್ಯಂತ ಕಡಿಮೆ ವೆಚ್ಚದಲ್ಲಿ, ಕೆಲವರಿಗೆ ಸುನಿಲ್ ಸಾಲ್ಯಾನ್ ಅವರೇ ಸಂಪೂರ್ಣ ವೆಚ್ಚ ಭರಿಸಿ ಈ ಪ್ರವಾಸವನ್ನು ಆಯೋಜಿಸಿದ್ದರು.
ತಮ್ಮ ಆದಾಯದ ಬಹುಪಾಲನ್ನು ಸಮಾಜದ ಬಾಂಧವರ ಆರ್ಥಿಕ ನೆರವಿಗೆ, ಹಿರಿಯ ನಾಗರಿಕರ ಪ್ರವಾಸಕ್ಕೆ ಹಾಗೂ ಅನಾಥಾಶ್ರಮಗಳಿಗೆ ಧನಸಹಾಯ ನೀಡಲು ಮೀಸಲಿಡುತ್ತಾ ಬಂದಿರುವ ಸುನಿಲ್ ಸಾಲ್ಯಾನ್ ಮತ್ತು ದೇವಕಿ ಸಾಲ್ಯಾನ್ ದಂಪತಿ, ಕುಲಾಲ ಸಂಘ ಮುಂಬೈನ ಬಹುಕೋಟಿ ವೆಚ್ಚದ ಮಂಗಳೂರಿನ ‘ಕುಲಾಲ ಭವನ’ ನಿರ್ಮಾಣಕ್ಕೂ ಅತ್ಯಂತ ದೊಡ್ಡ ಮೊತ್ತದ ದೇಣಿಗೆ ನೀಡಿದ್ದಾರೆ.
