ಮಂಗಳೂರಿನ ಪ್ರಸಿದ್ಧ ಉಳ್ಳಾಲ ಸಮುದ್ರ ತೀರದಲ್ಲಿ ಪ್ರಕೃತಿಯ ಅಪರೂಪದ ಚಮತ್ಕಾರವೊಂದು ನಡೆದಿದ್ದು, ಸ್ಥಳೀಯ ಮೀನುಗಾರರು ಹಾಗೂ ಸಾರ್ವಜನಿಕರಿಗೆ ಬೂತಾಯಿ ಮೀನಿನ ಬಂಪರ್ ಸುಗ್ಗಿಯಾಗಿದೆ. ಶುಕ್ರವಾರ ಮಧ್ಯಾಹ್ನ ಸುಮಾರು 11 ಗಂಟೆಯ ವೇಳೆಗೆ ಭಾರಿ ಪ್ರಮಾಣದ ಬೂತಾಯಿ ಮೀನುಗಳ ಹಿಂಡು ಒಮ್ಮಿಂದೊಮ್ಮೆಗೆ ದಡಕ್ಕೆ ಅಪ್ಪಳಿಸಿದ್ದು, ತೀರದುದ್ದಕ್ಕೂ ಬೆಳ್ಳಿಯ ಹಾಸಿನಂತೆ ಮೀನುಗಳು ಮಿನುಗತೊಡಗಿದವು. ಸಮುದ್ರದಲ್ಲಿ ಚಲಿಸುತ್ತಿದ್ದ ದೋಣಿಯೊಂದರ ಸದ್ದಿಗೆ ಹೆದರಿದ ಮೀನುಗಳ ಹಿಂಡು ದಿಕ್ಕು ತಪ್ಪಿ, ರಕ್ಷಣೆಯ ಆತುರದಲ್ಲಿ ದಡದ ಕಡೆಗೆ ನುಗ್ಗಿ ಬಂದಿದ್ದೇ ಈ ಅಪರೂಪದ ವಿದ್ಯಮಾನಕ್ಕೆ ಕಾರಣ ಎನ್ನಲಾಗಿದೆ.
ಈ ದೃಶ್ಯವನ್ನು ಕಂಡ ತಕ್ಷಣ ಸ್ಥಳೀಯ ನಿವಾಸಿಗಳು ಮತ್ತು ಮೀನುಗಾರರು ಅಲೆಗಳ ಅಬ್ಬರವನ್ನು ಲೆಕ್ಕಿಸದೆ ಸಮುದ್ರಕ್ಕೆ ಇಳಿದು, ಕೈಗೆ ಸಿಕ್ಕ ಪಾತ್ರೆ, ಬಕೆಟ್ ಹಾಗೂ ಚೀಲಗಳಲ್ಲಿ ಮೀನುಗಳನ್ನು ತುಂಬಿಸಿಕೊಳ್ಳಲು ಮುಗಿಬಿದ್ದರು. ಕೆಲವರು ತಮಗೆ ಸಿಕ್ಕ ಮೀನಿನ ರಾಶಿಯನ್ನು ಸ್ಥಳದಲ್ಲೇ ಮಾರಿ ಕೈತುಂಬಾ ಕಾಸು ಮಾಡಿಕೊಂಡರೆ, ಇನ್ನು ಕೆಲವರು ನೆರೆಹೊರೆಯವರಿಗೆ ಹಂಚಿ, ಮನೆಗೆ ಕೊಂಡೊಯ್ದು ಬೂತಾಯಿ ಮೀನಿನ ಖಾದ್ಯ ಸವಿದು ಸಂಭ್ರಮಿಸಿದರು. ಸಮುದ್ರ ತೀರದಲ್ಲಿ ಇಂತಹ ಮೀನಿನ ಸುಗ್ಗಿ ಬರುವುದು ಅತ್ಯಂತ ಅಪರೂಪವಾಗಿದ್ದು, ಕೆಲವು ತಿಂಗಳುಗಳ ಹಿಂದೆ ಉಡುಪಿಯ ಮಲ್ಪೆ ತೀರದಲ್ಲಿಯೂ ಇಂತಹದ್ದೇ ಘಟನೆ ನಡೆದಿತ್ತು. ಪ್ರಕೃತಿಯ ಈ ಧಾವಂತ ಸ್ಥಳೀಯರ ಪಾಲಿಗೆ ಮಾತ್ರ ಹಬ್ಬದ ವಾತಾವರಣವನ್ನು ಸೃಷ್ಟಿಸಿತ್ತು.
