ಮುಂಬೈನ ಘಾಟ್‌ಕೋಪರ್‌ ಪೂರ್ವ ಕ್ಷೇತ್ರದ ಬಿಜೆಪಿ ಶಾಸಕ ಪರಾಗ್ ಶಾ ಅವರು ಒಂದು ದಿನ ಭಿಕ್ಷುಕನ ವೇಷ ಧರಿಸಿ ಬೀದಿಗಿಳಿದು ಭಿಕ್ಷೆ ಬೇಡುವ ಮೂಲಕ ಜನಸಾಮಾನ್ಯರ ಬದುಕಿನ ಕಷ್ಟ–ಸಂಕಷ್ಟಗಳನ್ನು ಸ್ವತಃ ಅನುಭವಿಸಿದ ಅಪರೂಪದ ಘಟನೆ ಗಮನ ಸೆಳೆದಿದೆ. ಸುಮಾರು ₹5,000 ಕೋಟಿ ಆಸ್ತಿ ಹೊಂದಿರುವ ದೇಶದ ಶ್ರೀಮಂತ ರಾಜಕಾರಣಿಗಳಲ್ಲಿ ಒಬ್ಬರಾಗಿರುವ ಶಾ ಅವರು ತಮ್ಮ ಐಷಾರಾಮಿ ಜೀವನ, ಕಾರುಗಳು, ಭದ್ರತಾ ಸಿಬ್ಬಂದಿ ಸೇರಿದಂತೆ ಎಲ್ಲ ಸೌಲಭ್ಯಗಳನ್ನು ಒಂದು ದಿನದ ಮಟ್ಟಿಗೆ ಬದಿಗಿಟ್ಟು ಈ ವಿಶಿಷ್ಟ ಅನುಭವಕ್ಕೆ ಮುಂದಾದರು.
ಜೈನ ಧರ್ಮದ ಚಾತುರ್ಮಾಸದ ಸಂದರ್ಭದಲ್ಲಿ ಅವರ ಆಧ್ಯಾತ್ಮಿಕ ಗುರು ನಮ್ರಮುನಿ ಮಹಾರಾಜ್ ಅವರು ನೀಡಿದ ಸಲಹೆಯ ಮೇರೆಗೆ ಶಾ ಅವರು ಈ ಅನುಭವವನ್ನು ಸ್ವೀಕರಿಸಿದರು. ಗುರುಗಳ ಸೂಚನೆಯಂತೆ ಮೇಕಪ್‌ ಮೂಲಕ ತಮ್ಮ ಸ್ವರೂಪವನ್ನು ಸಂಪೂರ್ಣವಾಗಿ ಬದಲಿಸಿಕೊಂಡ ಅವರು, ಘಾಟ್‌ಕೋಪರ್‌ನ ಬೀದಿಗಳಲ್ಲಿ ಭಿಕ್ಷುಕನಂತೆ ಸಂಚರಿಸಿದರು. ಜನರ ಮುಂದೆ ಭಿಕ್ಷೆ ಬೇಡುವುದರ ಜೊತೆಗೆ, ಅಲ್ಲಿಯೇ ಆಹಾರ ಸೇವಿಸಿ, ಬಿಸಿಲು, ದೈಹಿಕ ಆಯಾಸ ಹಾಗೂ ಸಾರ್ವಜನಿಕರಿಂದ ಎದುರಾದ ಕಟುವಾದ ಮಾತುಗಳನ್ನೂ ಅನುಭವಿಸಿದರು.
ಈ ಒಂದು ದಿನದ ಅನುಭವ ತಮ್ಮ ಮನಸ್ಸಿನ ಮೇಲೆ ಆಳವಾದ ಪರಿಣಾಮ ಬೀರಿದೆ ಎಂದು ಶಾ ತಿಳಿಸಿದ್ದಾರೆ. ಹಣ, ಖ್ಯಾತಿ ಹಾಗೂ ಅಧಿಕಾರ ವ್ಯಕ್ತಿಯೊಳಗೆ ಅಹಂಕಾರವನ್ನು ಬೆಳೆಸುವ ಸಾಧ್ಯತೆಯಿದೆ. ಆದರೆ ಸಾಮಾನ್ಯ ಭಿಕ್ಷುಕನ ಬದುಕನ್ನು ಕೆಲಕಾಲ ಅನುಭವಿಸುವ ಮೂಲಕ ಆ ಅಹಂಕಾರದಿಂದ ದೂರವಾಗಿ, ಜೀವನದ ವಾಸ್ತವತೆಯನ್ನು ಅರಿತುಕೊಳ್ಳಲು ಹಾಗೂ ಮತ್ತಷ್ಟು ವಿನಮ್ರವಾಗಿ ಬದುಕಲು ಈ ಅನುಭವ ನೆರವಾಗಿದೆ ಎಂದು ಅವರು ಹೇಳಿದ್ದಾರೆ.
ತಮ್ಮ ಅನುಭವದ ವೇಳೆ ನಡೆದ ಎರಡು ಘಟನೆಗಳು ತಮ್ಮನ್ನು ವಿಶೇಷವಾಗಿ ಆಘಾತಕ್ಕೊಳಪಡಿಸಿದವು ಎಂದು ಶಾ ತಿಳಿಸಿದ್ದಾರೆ. ಭಿಕ್ಷುಕನ ವೇಷದಲ್ಲಿದ್ದಾಗ ತಾವು ವಾಸಿಸುವ ಅಪಾರ್ಟ್‌ಮೆಂಟ್‌ ಸಂಕೀರ್ಣಕ್ಕೆ ತೆರಳಿದ ಸಂದರ್ಭದಲ್ಲಿ ಅಲ್ಲಿನ ವಾಚ್‌ಮನ್‌ ಅವರನ್ನು ಗುರುತಿಸದೆ ಒಳಗೆ ಪ್ರವೇಶಿಸಲು ಅವಕಾಶ ನೀಡದೆ ಹೊರಗೆ ಕಳುಹಿಸಿದ್ದಾನೆ. ಅದೇ ರೀತಿ, ಸದಾ ಇತರರಿಗೆ ನೆರವು ನೀಡುವ ತಮ್ಮ ಆಪ್ತ ಸ್ನೇಹಿತರೊಬ್ಬರ ಬಳಿಗೂ ಭಿಕ್ಷುಕನ ವೇಷದಲ್ಲಿ ತೆರಳಿದಾಗ, ಅವರು ಕೂಡ ಗುರುತಿಸದೆ ಅಲ್ಲಿಂದ ಓಡಿಸಿದ್ದಾರೆ ಎಂದು ಶಾ ಹೇಳಿದ್ದಾರೆ.
ಈ ಘಟನೆಗಳು ಮನುಷ್ಯನನ್ನು ವ್ಯಕ್ತಿತ್ವದ ಆಧಾರದ ಮೇಲೆ ಅಲ್ಲದೆ, ಆತನ ಹಣ, ಸ್ಥಾನಮಾನ ಹಾಗೂ ಅಧಿಕಾರದ ಆಧಾರದ ಮೇಲೆ ಅಳೆಯುವ ಸಮಾಜದ ಮನೋಭಾವದ ಬಗ್ಗೆ ತಮ್ಮನ್ನು ಆಳವಾಗಿ ಚಿಂತಿಸುವಂತೆ ಮಾಡಿವೆ ಎಂದು ಅವರು ತಿಳಿಸಿದ್ದಾರೆ.
ನಂತರ ಮೇಕಪ್‌ ತೆಗೆದು ತಮ್ಮ ನೈಜ ಸ್ವರೂಪಕ್ಕೆ ಮರಳಿದ ಶಾ ಅವರು, ಭಿಕ್ಷುಕನ ವೇಷದಲ್ಲಿದ್ದಾಗ ಭೇಟಿ ನೀಡಿದ್ದ ಅದೇ ಸ್ಥಳಗಳಿಗೆ ಮತ್ತೆ ತೆರಳಿ ಅಲ್ಲಿನ ಜನರನ್ನು ಭೇಟಿಯಾದರು. ಅವರೊಂದಿಗೆ ಸಂವಾದ ನಡೆಸಿ, ಅವರ ಬದುಕಿನ ಪರಿಸ್ಥಿತಿಗಳು ಹಾಗೂ ಎದುರಿಸುತ್ತಿರುವ ಸಮಸ್ಯೆಗಳ ಕುರಿತು ಅರಿತುಕೊಳ್ಳಲು ಪ್ರಯತ್ನಿಸಿದರು.
“ಇದು ನನ್ನ ಗುರುಗಳ ಆಜ್ಞೆಯಾಗಿತ್ತು. ಅವರು ನೀಡಿದ ಸಲಹೆ ನನ್ನ ಒಳಿತಿಗಾಗಿಯೇ ಎಂಬ ನಂಬಿಕೆಯಿಂದ ನಾನು ಅದನ್ನು ಪಾಲಿಸಿದೆ” ಎಂದು ಶಾ ಹೇಳಿದ್ದಾರೆ. ಹಣ, ಅಧಿಕಾರ ಮತ್ತು ಸ್ಥಾನಮಾನಕ್ಕಿಂತ ಮಾನವೀಯತೆ ಹಾಗೂ ಸರಳತೆಯೇ ಜೀವನದ ನಿಜವಾದ ಮೌಲ್ಯ ಎಂಬುದನ್ನು ಈ ವಿಭಿನ್ನ ಅನುಭವ ಮತ್ತೊಮ್ಮೆ ಮನದಟ್ಟು ಮಾಡಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.
