ಮುಂಬಯಿ ಅಕ್ಟೋಬರ್ 9: ಮುಂಬಯಿಯ ಪೊವಾಯಿ ಶ್ರೀ ಮಹಾಶೇಷ ರುಂಡಮಾಲಿನಿ ದೇವಸ್ಥಾನದಲ್ಲಿ ನಡೆದ ನವರಾತ್ರಿ ಉತ್ಸವವು ಈ ಬಾರಿ ಭಕ್ತಿ, ಸಂಭ್ರಮ ಮತ್ತು ಧಾರ್ಮಿಕ ವೈಭವದೊಂದಿಗೆ ವಿಜೃಂಭಣೆಯಿಂದ ಸಂಪನ್ನಗೊಂಡಿತು. ಒಂಬತ್ತು ದಿನಗಳ ಕಾಲ ನಡೆದ ಈ ಮಹೋತ್ಸವದಲ್ಲಿ ಅಪಾರ ಸಂಖ್ಯೆಯ ಭಕ್ತಾದಿಗಳು, ರಾಜಕೀಯ ನಾಯಕರು, ಧಾರ್ಮಿಕ ಮುಖಂಡರು ಮತ್ತು ಉದ್ಯಮಿಗಳು ಪಾಲ್ಗೊಂಡು ದೇವಿಯ ಕೃಪೆಗೆ ಪಾತ್ರರಾದರು.
ಪ್ರತಿದಿನ ಸಹಸ್ರಾರು ಭಕ್ತರು ಆಗಮಿಸಿ ಶ್ರೀ ದೇವರ ಪ್ರಸಾದವನ್ನು ಸ್ವೀಕರಿಸಿದರು. ಕ್ಷೇತ್ರದ ಧರ್ಮದರ್ಶಿ ಶ್ರೀ ಸುವರ್ಣ ಬಾಬರವರು ನೆರೆದ ಭಕ್ತಾದಿಗಳಿಗೆ ಆಶೀರ್ವದಿಸಿ, ಶುಭ ಹಾರೈಸಿದರು. ದೇವಸ್ಥಾನದ ಆವರಣವು ಭಕ್ತಿಗೀತೆಗಳು ಮತ್ತು ಧಾರ್ಮಿಕ ವಿಧಿಗಳಿಂದ ನಿರಂತರವಾಗಿ ಪುಳಕಗೊಂಡಿತ್ತು.
ಸ್ಯಾಕ್ಸೋಫೋನ್ ವಾದಕ ದಿನೇಶ್ ಕೋಟ್ಯಾನ್ ಅವರಿಗೆ ‘ಬಂಗಾರದ ಪದಕ ಗೌರವ’
ದಸರಾ ಮಹೋತ್ಸವವು ಅಕ್ಟೋಬರ್ 5ರಂದು ದೇವಿಯ ಭವ್ಯ ವಿಸರ್ಜನಾ ಶೋಭಾಯಾತ್ರೆಯೊಂದಿಗೆ ಸಂಪನ್ನಗೊಂಡಿತು. ಈ ಶೋಭಾಯಾತ್ರೆಯು ದೇವಸ್ಥಾನದ ವೈಭವಕ್ಕೆ ಕಿರೀಟವಿಟ್ಟಂತಿತ್ತು. ಈ ಸಂದರ್ಭದಲ್ಲಿ ದೇವಸ್ಥಾನದಲ್ಲಿ ನಿರಂತರವಾಗಿ ತಮ್ಮ ಸ್ಯಾಕ್ಸೋಫೋನ್ ವಾದನದ ಮೂಲಕ ಸೇವೆ ಸಲ್ಲಿಸುತ್ತಾ ಬಂದಿರುವ ಜರಿಮೆರಿ ದಿನೇಶ್ ಕೋಟ್ಯಾನ್ ಅವರನ್ನು ವಿಶೇಷವಾಗಿ ಗೌರವಿಸಲಾಯಿತು.
ಸಂಗೀತ ಸೇವೆಯನ್ನು ಗುರುತಿಸಿ, ಶ್ರೀ ಸುವರ್ಣ ಬಾಬರವರು ದಿನೇಶ್ ಕೋಟ್ಯಾನ್ ಅವರು ವಾದನ ಮಾಡುತ್ತಿರುವ ಸ್ಯಾಕ್ಸೋಫೋನ್ಗೆ ಬಂಗಾರದ ಪದಕವನ್ನು ಸಮರ್ಪಿಸಿದರು. ಜೊತೆಗೆ, ಶ್ರೀ ದೇವರ ಪ್ರಸಾದವನ್ನು ನೀಡಿ ಹಾರೈಸಿದರು. ಅವರ ಕಲಾಸೇವೆಗೆ ದೊರೆತ ಈ ಅಪೂರ್ವ ಗೌರವವು ಕಲಾವಿದರ ಶ್ರಮಕ್ಕೆ ಸಂದ ನಿಜವಾದ ಪ್ರತಿಫಲವಾಗಿತ್ತು.
ಈ ಮಹತ್ವದ ಸಂದರ್ಭದಲ್ಲಿ ಕ್ಷೇತ್ರದ ಪ್ರಮುಖರಾದ ಜಗದೀಶ್ ಸುವರ್ಣ, ರಾಹುಲ್ ಸುವರ್ಣ, ಸಂತೋಷ್ ಸುವರ್ಣ, ಕೇಶವ ಅಂಚನ್, ನ್ಯಾಯವಾದಿ ರವಿ ಕೋಟ್ಯಾನ್ ಕಟೀಲ್, ಹೋಟೆಲ್ ಉದ್ಯಮಿಗಳಾದ ಪ್ರದೀಪ್ ಪೂಜಾರಿ ಮತ್ತು ಸುಧಾಕರ್ ಪೂಜಾರಿ, ಹಾಗೂ ಪುರಂದರ ಸುವರ್ಣ ಬಂಟ್ವಾಳ ಸೇರಿದಂತೆ ಹಲವು ಗಣ್ಯರು ಪಾಲ್ಗೊಂಡಿದ್ದರು.
ದೇವಿಯ ವಿಸರ್ಜನೆಯ ಭವ್ಯ ಶೋಭಾಯಾತ್ರೆಯು ವಿಶೇಷ ಆಕರ್ಷಣೆಗಳಿಂದ ಕಳೆಗಟ್ಟಿತ್ತು. ಪಿ.ಆರ್. ಅಂಚನ್ ಮತ್ತು ಅವರ ತಂಡದ ಮನಮೋಹಕ ಹುಲಿ ವೇಷಗಳು, ಭವ್ಯವಾದ ಚೆಂಡೆ-ಕೊಂಬು ವಾದನ ಮತ್ತು ಪುರಾತನ ಬೇತಾಳ ನೃತ್ಯಗಳು ಮೆರವಣಿಗೆಗೆ ಮತ್ತಷ್ಟು ಮೆರಗು ನೀಡಿದವು. ಭಕ್ತಿಭಾವದ ಜೊತೆಗೆ ಕಲಾ ಮತ್ತು ಸಾಂಸ್ಕೃತಿಕ ಸಿರಿಯನ್ನು ಪಸರಿಸಿದ ಈ ಉತ್ಸವವು ಮುಂಬಯಿ ಭಕ್ತರ ಮನದಲ್ಲಿ ಶಾಶ್ವತವಾಗಿ ಉಳಿಯುವಂತಾಯಿತು.
