ಮುಂಬೈ: ಕುಲಾಲ ಸಂಘ ಮುಂಬೈ ಮಹಿಳಾ ವಿಭಾಗದ ಆಸ್ರೊಡು “ನಮ್ಮ ಸಂಸ್ಕೃತಿ” (ತುಳುವೆರೆ ಆಯನ) ಪನ್ಪಿ ಲೇಸ್ ಬರ್ಪಿ ಸೆಪ್ಟೆಂಬರ್ 20 ತಾರೀಕ್‌ಗ್ ದಾದರ್ ಮೂಡಾಯಿದ ಸೆಂಟ್ ಜಾರ್ಜ್ ಆಡಿಟೋರಿಯಂ‌ಡ್ ಕಾಂಡೆ 9 ಗಂಟೆರ್ದ್ ಬಯ್ಯಗ್ 6 ಗಂಟೆ ಮುಟ್ಟ ನಡಪರೆ ಉಂಡು.
ಈ ಲೇಸ್‌ಗ್ ಸಂಬಂಧಪಟ್ಟಿನ ಲೆಪ್ಪೋಲೆನ್ (ಆಮಂತ್ರಣ ಪತ್ರಿಕೆ) ಸೆಪ್ಟೆಂಬರ್ 9 ತಾರೀಕ್‌ಗ್ ಕುಲಾಲ ಸಂಘದ ಕೇಂದ್ರೀಯ ಕಚೇರಿಡ್ ಸಂಘದ ಗುರ್ಕಾರ್ರ್ (ಅಧ್ಯಕ್ಷೆರ್) ರಘು ಎ. ಮೂಲ್ಯ ಪಾದೆಬೆಟ್ಟು ಬುಡುಗಡೆ ಮಲ್ತೆರ್.
ಬೊಕ್ಕ ಪಾತೆರಿನ ಆರ್, “ಸಂಘದ ಮಹಿಳಾ ವಿಭಾಗ ಬೊಕ್ಕ 5 ಪ್ರಾದೇಶಿಕ ಸಮಿತಿದ ಮಹಿಳಾ ವಿಭಾಗದ ಮೆಂಬರ್ಲು ಈ ಲೇಸ್‌ದ ಮುಖಾಂತರ ತಂಕುಲೆನ ಕಲಾ ಪ್ರತಿಭೆನ್ ತೋಜಾವರೆ ಉಲ್ಲೆರ್. ಅಂಚಾದ್ ಸಮಾಜ ಬಾಂಧವೆರ್ ಮಲ್ಲ ಸಂಕ್ಯೆಡ್ ಬತ್ತ್‌ದ್ ಲೇಸ್‌ಗ್ ಬೆಂಬಲ ಕೊರೊಡು” ಪಂಡ್‌ದ್ ಲೆಪ್ಪೋಲೆ ಕೊರಿಯೆರ್.
ಮಹಿಳಾ ವಿಭಾಗದ ಕಾರ್ಯಧ್ಯಕ್ಷೆ ಸುಚಿತ್ ಡಿ. ಬಂಜನ್ ಪಾತೆರ್ದ್, “ಪಗೆಲ್‌ಡೀ ನಡಪುನ ಈ ಲೇಸ್‌ಡ್ ತುಳುನಾಡ್ದ ಸಂಸ್ಕೃತಿನ್ ತೋಜಾವುನ ನಾಟಕ-ನಾಟ್ಯ ಪಂತೊಲು, ಹಿರಿಯ ನಾಗರಿಕೆರೆಗ್ ಮಾನದಿಗೆ, ಅಂಚನೆ ವಿಸೇಸವಾಯಿನ ನೃತ್ಯ ಪ್ರದರ್ಶನೊಲು ನಡಪರೆ ಉಂಡು” ಪಂಡ್‌ದ್ ತೆರಿಪಾಯೆರ್.
ಈ ಪೊರ್ತುಡು ಸಂಘದ ಗೌರವಾಧ್ಯಕ್ಷೆರ್ ದೇವದಾಸ್ ಎಲ್. ಕುಲಾಲ್, ಉಪಾಧ್ಯಕ್ಷೆರ್ ಡಿ. ಐ. ಮೂಲ್ಯ, ಕಾರ್ಯದರ್ಶಿ ಕರುಣಾಕರ್ ಸಾಲಿಯನ್, ಕೋಶಾಧಿಕಾರಿ ಜಯ ಅಂಚನ್ ಅಂಚನೆ ಬೇತೆ ಪದಾಧಿಕಾರಿಲು ಇತ್ತೆರ್. ಮಹಿಳಾ ವಿಭಾಗದ ಕಾರ್ಯದರ್ಶಿ ನಯನ್ ಎನ್. ಬಂಗೇರ, ಕೋಶಾಧಿಕಾರಿ ಲತಾ ಎಸ್. ಮೂಲ್ಯ, ಜೊತೆ ಕಾರ್ಯದರ್ಶಿ ಆರತಿ ಕೆ. ಸಾಲ್ಯಾನ್, ಜೊತೆ ಕೋಶಾಧಿಕಾರಿ ಚಂದ್ರಾವತಿ ಎಸ್. ಸಾಲ್ಯಾನ್ ಬೊಕ್ಕ ಮಹಿಳಾ ವಿಭಾಗದ ಬೇತೆ ಪದಾಧಿಕಾರಿಲು ಮಾತಾ ಪಾಲ್ ಪಡೆದಿತ್ತೆರ್.
