ವೇಷದ ಹಿಂದೆ ಮಾನವೀಯತೆಯ ಮಹಾಸೇವೆ: ಮಕ್ಕಳ ಬದುಕಿಗೆ ಬೆಳಕಾದ ರವಿ ಕಟಪಾಡಿ

ಮನಸ್ಸಿದ್ದರೆ ಮಾರ್ಗ ಎಂಬ ಮಾತು ಸುಳ್ಳಲ್ಲ. ಜೀವನದಲ್ಲಿ ತಾನು ಅನುಭವಿಸಿದ ನೋವು, ಸಂಕಷ್ಟ ಹಾಗೂ ಅಸಹಾಯಕತೆಯನ್ನು ಮರೆಯದೆ, ಅದೇ ನೋವನ್ನು ಎದುರಿಸುತ್ತಿರುವವರ ಕಣ್ಣೀರು ಒರೆಸಬೇಕು ಎಂಬ ಸಂಕಲ್ಪದೊಂದಿಗೆ ತನ್ನ ಕಲಾ ಪ್ರತಿಭೆಯನ್ನೇ ಸಮಾಜ ಸೇವೆಯ ಮಾಧ್ಯಮವನ್ನಾಗಿ ಮಾಡಿಕೊಂಡಿರುವ ಅಪರೂಪದ ವ್ಯಕ್ತಿತ್ವವೇ ಉಡುಪಿ ಜಿಲ್ಲೆಯ ಕಟಪಾಡಿಯ ರವಿ ಕಟಪಾಡಿ.
ಕಳೆದ ಹಲವು ವರ್ಷಗಳಿಂದ ಶ್ರೀಕೃಷ್ಣ ಜನ್ಮಾಷ್ಟಮಿ ಹಾಗೂ ವಿಟ್ಲಪಿಂಡಿ ಉತ್ಸವದ ಸಂದರ್ಭದಲ್ಲಿ ವಿಭಿನ್ನ ಹಾಗೂ ಆಕರ್ಷಕ ವೇಷಗಳನ್ನು ಧರಿಸಿ, ಮುಖಕ್ಕೆ ಬಣ್ಣ ಹಚ್ಚಿಕೊಂಡು ಜನರ ನಡುವೆ ಸಂಚರಿಸುತ್ತಿರುವ ರವಿ ಕಟಪಾಡಿ, ಈ ಕಲಾ ಪ್ರದರ್ಶನದ ಮೂಲಕ ಸಂಗ್ರಹವಾಗುವ ಹಣವನ್ನು 12 ವರ್ಷದೊಳಗಿನ ಅನಾರೋಗ್ಯಪೀಡಿತ ಮಕ್ಕಳ ಚಿಕಿತ್ಸೆಗೆ ನೀಡುತ್ತಿದ್ದಾರೆ. ತಮ್ಮ ಸ್ವಂತ ಜೀವನದಲ್ಲಿ ಎದುರಿಸಿದ ಕಷ್ಟವೇ ಈ ಸೇವಾ ಸಂಕಲ್ಪಕ್ಕೆ ಪ್ರೇರಣೆಯಾಗಿದ್ದು, ಇಂದು ಅವರ ಸೇವೆ ಅನೇಕ ಮಕ್ಕಳ ಬದುಕಿಗೆ ಆಶಾಕಿರಣವಾಗಿದೆ.
ಉಡುಪಿ ಜಿಲ್ಲೆಯ ಕಟಪಾಡಿಯಲ್ಲಿ ಸಾಮಾನ್ಯ ಕುಟುಂಬದಲ್ಲಿ ಬೆಳೆದ ರವಿ ಕಟಪಾಡಿ, ಕಟ್ಟಡ ನಿರ್ಮಾಣ ಕ್ಷೇತ್ರದಲ್ಲಿ ದಿನಗೂಲಿ ಕಾರ್ಮಿಕರಾಗಿ ದುಡಿಯುತ್ತಾ ಜೀವನ ಸಾಗಿಸುತ್ತಿದ್ದಾರೆ. ಹೆಚ್ಚಿನ ಆರ್ಥಿಕ ಸಂಪನ್ಮೂಲಗಳಾಗಲಿ, ಹೆಚ್ಚಿನ ವಿದ್ಯಾಭ್ಯಾಸವಾಗಲಿ ಇಲ್ಲದಿದ್ದರೂ, ಸಮಾಜಕ್ಕೆ ತನ್ನ ಕೈಲಾದಷ್ಟು ಒಳ್ಳೆಯದನ್ನು ಮಾಡಬೇಕು, ಕಷ್ಟದಲ್ಲಿರುವವರಿಗೆ ಆರ್ಥಿಕ ನೆರವು ನೀಡಬೇಕು ಎಂಬ ಹಂಬಲ ಅವರ ಮನಸ್ಸಿನಲ್ಲಿ ಸದಾ ಇತ್ತು. ಇದೇ ಹಂಬಲಕ್ಕೆ ತಮ್ಮ ಕಲಾ ಪ್ರತಿಭೆಯನ್ನು ಜೋಡಿಸಿಕೊಂಡ ಅವರು, ತಮ್ಮ ವೇಷಧಾರಣೆಯ ಮೂಲಕ ಹಣ ಸಂಗ್ರಹಿಸಿ ಅನಾರೋಗ್ಯಪೀಡಿತ ಮಕ್ಕಳ ಆಸ್ಪತ್ರೆ ಬಿಲ್ ಹಾಗೂ ಚಿಕಿತ್ಸಾ ವೆಚ್ಚ ಭರಿಸಲು ನೆರವಾಗುವ ಮಹತ್ಕಾರ್ಯಕ್ಕೆ ಮುಂದಾದರು.
2014ರಿಂದ ಅವರು ಈ ಸಮಾಜ ಸೇವೆಗೆ ವಿಶೇಷವಾಗಿ ಚಾಲನೆ ನೀಡಿದರು. ಆರಂಭದಲ್ಲಿ ಕೇವಲ ಮನರಂಜನೆಗಾಗಿ ವೇಷ ಧರಿಸುತ್ತಿದ್ದ ರವಿ ಕಟಪಾಡಿಯವರಿಗೆ, ಅನಾರೋಗ್ಯದಿಂದ ಬಳಲುತ್ತಿದ್ದ ಮಗುವಿನ ಚಿಕಿತ್ಸೆಗೆ ಹಣದ ಅಗತ್ಯವಿದೆ ಎಂಬುದು ತಿಳಿದುಬಂದಾಗ ತಮ್ಮ ವೇಷಧಾರಣೆಯನ್ನೇ ಸಮಾಜ ಸೇವೆಯೊಂದಿಗೆ ಜೋಡಿಸುವ ಆಲೋಚನೆ ಮೂಡಿತು. ಅಂದಿನಿಂದ ಪ್ರತಿವರ್ಷ ವಿಭಿನ್ನ ವೇಷಗಳನ್ನು ಧರಿಸಿ ಜನರಿಂದ ದೇಣಿಗೆ ಸಂಗ್ರಹಿಸಿ, ಅಗತ್ಯವಿರುವ ಮಕ್ಕಳ ಚಿಕಿತ್ಸೆಗೆ ನೆರವಾಗುತ್ತಾ ಬಂದಿದ್ದಾರೆ.

2026ರ ವರದಿಗಳ ಪ್ರಕಾರ, ಕಳೆದ 14 ವರ್ಷಗಳಲ್ಲಿ ರವಿ ಕಟಪಾಡಿ ಹಾಗೂ ಅವರ ತಂಡ ಸುಮಾರು ₹2 ಕೋಟಿಗೂ ಅಧಿಕ ಮೊತ್ತವನ್ನು ಸಂಗ್ರಹಿಸಿ 211 ಅನಾರೋಗ್ಯಪೀಡಿತ ಮಕ್ಕಳ ಚಿಕಿತ್ಸೆಗೆ ನೆರವು ನೀಡಿದೆ. ಪ್ರತಿವರ್ಷ ಸಂಗ್ರಹವಾಗುವ ಸಹಾಯಧನವನ್ನು ಫಲಾನುಭವಿ ಮಕ್ಕಳ ಪೋಷಕರಿಗೆ ಹಸ್ತಾಂತರಿಸುವ ಕಾರ್ಯವೂ ನಡೆಯುತ್ತಿದೆ.
ರವಿ ಕಟಪಾಡಿಯವರ ಸೇವೆಯ ವಿಶೇಷತೆ ಎಂದರೆ, ಅವರು ಸ್ವತಃ ಆರ್ಥಿಕವಾಗಿ ಶ್ರೀಮಂತರಲ್ಲದಿದ್ದರೂ ತಮ್ಮ ದುಡಿಮೆಯ ನಡುವೆಯೇ ಸಮಾಜ ಸೇವೆಗೆ ಸಮಯ ಮೀಸಲಿಡುತ್ತಿರುವುದು. ಒಂದು ವಿಶೇಷ ಪ್ರಾಣಿಯ ವೇಷವನ್ನು ಸಿದ್ಧಪಡಿಸಲು ಒಟ್ಟಾರೆಯಾಗಿ ಸುಮಾರು ₹2 ಲಕ್ಷ ವೆಚ್ಚವಾಗುತ್ತದೆ. ಈ ಹಣವನ್ನು ತಾವೇ ತಮ್ಮ ಸ್ವಂತ ದುಡಿಮೆಯಿಂದ ಭರಿಸುತ್ತಾರೆ. ಜನ್ಮಾಷ್ಟಮಿ ಸಂದರ್ಭದಲ್ಲಿ ಜನರು ನೀಡುವ ಹಣದಲ್ಲಿ ಒಂದು ಪೈಸೆಯನ್ನೂ ವೈಯಕ್ತಿಕವಾಗಿ ಬಳಸುವುದಿಲ್ಲ. ಸಂಗ್ರಹವಾಗುವ ಹಣವನ್ನು ಸಂಪೂರ್ಣವಾಗಿ ಅನಾರೋಗ್ಯದಿಂದ ಬಳಲುತ್ತಿರುವ ಮಕ್ಕಳ ಆಸ್ಪತ್ರೆ ಬಿಲ್ ಹಾಗೂ ಚಿಕಿತ್ಸಾ ವೆಚ್ಚಕ್ಕಾಗಿ ನೀಡುತ್ತಾರೆ.
ಒಮ್ಮೆ ದೆಹಲಿಗೆ ಕಾರ್ಯಕ್ರಮವೊಂದಕ್ಕೆ ತೆರಳಿದ್ದ ಸಂದರ್ಭದಲ್ಲಿ ವೇದಿಕೆ ಕಾರ್ಯಕ್ರಮದಲ್ಲಿ ಅವರಿಗೆ ₹1 ಲಕ್ಷ ನೀಡಲಾಗಿತ್ತು. ಆ ಹಣವನ್ನೂ ತಮ್ಮ ವೈಯಕ್ತಿಕ ಬಳಕೆಗೆ ತೆಗೆದುಕೊಳ್ಳದೆ, ಅನಾರೋಗ್ಯದಿಂದ ಬಳಲುತ್ತಿರುವ ಮಕ್ಕಳ ಚಿಕಿತ್ಸಾ ವೆಚ್ಚಕ್ಕೆ ಬಳಸಿರುವುದು ಅವರ ಸೇವಾ ಮನೋಭಾವಕ್ಕೆ ಮತ್ತೊಂದು ಉದಾಹರಣೆಯಾಗಿದೆ.
ಶ್ರೀಕೃಷ್ಣ ಜನ್ಮಾಷ್ಟಮಿ ಮತ್ತು ವಿಟ್ಲಪಿಂಡಿ ಉತ್ಸವದ ಸಂದರ್ಭದಲ್ಲಿ ಉಡುಪಿ, ಕಟಪಾಡಿ, ಕಾಪು, ಮಲ್ಪೆ, ಶಿರ್ವ ಸೇರಿದಂತೆ ವಿವಿಧ ಪ್ರದೇಶಗಳಲ್ಲಿ ರವಿ ಕಟಪಾಡಿಯವರ ವಿಶಿಷ್ಟ ವೇಷಧಾರಣೆ ಜನರ ಗಮನ ಸೆಳೆಯುತ್ತದೆ. ಅವರ ವೇಷಗಳ ಹಿಂದೆ ಹಲವು ಗಂಟೆಗಳ ಪರಿಶ್ರಮ, ಸೃಜನಶೀಲತೆ ಮತ್ತು ದೈಹಿಕ ಕಷ್ಟ ಅಡಗಿದೆ. ಸಿನಿಮಾ ಶೈಲಿಯ ಇವರ ವೇಷಗಳ ತಯಾರಿಕೆಗೆ ಕನಿಷ್ಠ 20 ಗಂಟೆಗಳ ಸಮಯ ಬೇಕಾಗುತ್ತದೆ. ವಿದೇಶದಿಂದ ತರಿಸಲಾಗುವ ವಿಶೇಷ ಬಣ್ಣ ಹಾಗೂ ಪ್ರಾಸ್ತೆಟಿಕ್ ಸಾಮಗ್ರಿಗಳನ್ನು ಬಳಸಲಾಗುತ್ತದೆ. ಹಬ್ಬದ ಮೂರು ದಿನಗಳ ಕಾಲ ವೇಷ ಧರಿಸುವ ಸಂದರ್ಭದಲ್ಲಿ ಆಹಾರ ಮತ್ತು ನೀರಿನ ಸೇವನೆಯನ್ನೂ ಬಹಳಷ್ಟು ಕಡಿಮೆ ಮಾಡಿಕೊಳ್ಳುತ್ತಾರೆ.
ರವಿ ಕಟಪಾಡಿಯವರ ವೇಷಗಳ ಪಯಣವೂ ಅತ್ಯಂತ ವಿಶಿಷ್ಟವಾಗಿದೆ. ಆರಂಭಿಕ ವರ್ಷಗಳಲ್ಲಿ ಹಾಲಿವುಡ್ ಸೂಪರ್ ಹೀರೋ ‘ಸ್ಪೈಡರ್ ಮ್ಯಾನ್’ ವೇಷ ಧರಿಸಿ, ಮರ ಹಾಗೂ ಕಟ್ಟಡಗಳಿಂದ ತಲೆಕೆಳಗಾಗಿ ನೇತಾಡುತ್ತಾ ಜನರನ್ನು ರಂಜಿಸಿದ್ದರು. 2015ರಲ್ಲಿ ‘ಪ್ಯಾನ್ಸ್ ಲ್ಯಾಬಿರಿಂತ್’ ಎಂಬ ಸ್ಪ್ಯಾನಿಷ್ ಚಲನಚಿತ್ರದ ಕಾಲ್ಪನಿಕ ಪ್ರಾಣಿಯಾದ ‘ಫಾನ್’ ವೇಷ ಧರಿಸಿದರು. ಇದೇ ಅವಧಿಯಿಂದ ಕೇವಲ ಮನರಂಜನೆಗಾಗಿ ಮಾತ್ರವಲ್ಲದೆ, ಕಾಯಿಲೆಯಿಂದ ಬಳಲುತ್ತಿರುವ ಮಕ್ಕಳ ಚಿಕಿತ್ಸೆಗಾಗಿ ದೇಣಿಗೆ ಸಂಗ್ರಹಿಸುವ ಸೇವಾ ಕಾರ್ಯಕ್ಕೆ ಅವರು ಮತ್ತಷ್ಟು ಒತ್ತು ನೀಡಿದರು.

‘ಜಾನ್ ಕಾರ್ಟರ್’ ಸೈನ್ಸ್ ಫಿಕ್ಷನ್ ಚಿತ್ರದಿಂದ ಪ್ರೇರಿತವಾದ ಹಲವು ಕೈಗಳಿರುವ ದೈತ್ಯಾಕಾರದ ಪರಗ್ರಹ ಜೀವಿಯ ‘ಸಾರ್ಕೋಜಾ’, ‘ಪೈರೇಟ್ಸ್ ಆಫ್ ದಿ ಕೆರಿಬಿಯನ್’ ಚಿತ್ರದ ಆಕ್ಟೋಪಸ್ ಮುಖದ ಖಳನಾಯಕ ‘ಡೇವಿ ಜೋನ್ಸ್’, ‘ಗಾಡ್ ಆಫ್ ವಾರ್’ ಜನಪ್ರಿಯ ವಿಡಿಯೋ ಗೇಮ್‌ನಿಂದ ಪ್ರೇರಿತವಾದ ‘ಡಾರ್ಕ್‌ಒನ್ ಎಲೈಟ್’ ಸೇರಿದಂತೆ ಹಲವು ವೇಷಗಳಲ್ಲಿ ಅವರು ಕಾಣಿಸಿಕೊಂಡಿದ್ದಾರೆ. ದಿನೇಶ್ ಮಟ್ಟೂ ಮತ್ತು ಹರೀಶ್ ಅವರಂತಹ ಸ್ಥಳೀಯ ಕಲಾವಿದರ ಸಹಾಯದಿಂದ ವಿಶೇಷ ಸ್ಕಿನ್ ಪ್ರಾಸ್ತೆಟಿಕ್ಸ್ ಬಳಸಿ ವಿಭಿನ್ನ ಹಾಗೂ ಭಯಾನಕ ರಾಕ್ಷಸ ವೇಷಗಳನ್ನೂ ಸಿದ್ಧಪಡಿಸಿದ್ದಾರೆ.
2024ರಲ್ಲಿ ಹಾಲಿವುಡ್‌ನ ‘ಅವತಾರ್: ದಿ ವೇ ಆಫ್ ವಾಟರ್’ ಚಿತ್ರದಿಂದ ಪ್ರೇರಿತವಾದ ನೀಲಿ ಬಣ್ಣದ ‘ನಾ’ವಿ’ ಯೋಧನ ವೇಷದಲ್ಲಿ ಕಾಣಿಸಿಕೊಂಡರು. ಅವರ ಮೆರವಣಿಗೆಗೆ ಪೂರಕವಾಗಿ ಯಾಂತ್ರಿಕವಾಗಿ ಹಾರುವ ದೊಡ್ಡ ಹಕ್ಕಿಯ ಮಾದರಿಯನ್ನೂ ಸಿದ್ಧಪಡಿಸಲಾಗಿತ್ತು.
2026ರಲ್ಲಿ ಸಮುದ್ರದ ಕಾಲ್ಪನಿಕ ಜೀವಿಯ ರೂಪವಾದ ‘ಮತ್ಸ್ಯಕನ್ಯೆ / ಮರ್ಮನ್’ ವೇಷ ಧರಿಸಿದ್ದು, ಇದು ರವಿ ಕಟಪಾಡಿಯವರ 15ನೇ ಹಾಗೂ ಕೊನೆಯ ವೇಷವಾಗಿದೆ. ವರ್ಷಗಳಿಂದ ರಾಸಾಯನಿಕ ಬಣ್ಣ ಹಾಗೂ ಪ್ರಾಸ್ತೆಟಿಕ್ಸ್ ಬಳಸಿದ್ದರಿಂದ ಅವರ ಚರ್ಮ ಮತ್ತು ಉಸಿರಾಟದ ಆರೋಗ್ಯದ ಮೇಲೆ ತೀವ್ರ ಪರಿಣಾಮ ಬೀರಿರುವ ಹಿನ್ನೆಲೆಯಲ್ಲಿ, ಈ ವೇಷದೊಂದಿಗೆ ತಮ್ಮ ಐತಿಹಾಸಿಕ ಸಾಮಾಜಿಕ ಸೇವಾ ವೇಷದ ಪಯಣಕ್ಕೆ ಅಧಿಕೃತವಾಗಿ ವಿದಾಯ ಹೇಳಿದ್ದಾರೆ.
ಇತ್ತೀಚೆಗೆ ಉಡುಪಿಯ ರಥಬೀದಿಯಲ್ಲಿ ಮೊಸರು ಕುಡಿಕೆ ದಿನದ ಸಂದರ್ಭದಲ್ಲಿ ರವಿ ಕಟಪಾಡಿಯವರ ವೇಷವನ್ನು ಕಂಡು, ಅವರನ್ನು ನನ್ನ ಮಿತ್ರರಾದ ಸುದೇಶ್ ಭಂಡಾರಿ, ಗುಣಪಾಲ್ ಶೆಟ್ಟಿ ಹಾಗೂ ಸಂತೋಷ್ ಪೂಜಾರಿ ಅವರೊಂದಿಗೆ ಭೇಟಿ ಮಾಡಿ ವಿಚಾರಿಸಿದಾಗ, ತಮ್ಮ ಸೇವೆಯ ಹಿಂದಿರುವ ಮನಕಲಕುವ ಕಥೆಯನ್ನು ರವಿ ಕಟಪಾಡಿ ಹಂಚಿಕೊಂಡರು.
‘ನಾನು ಸಣ್ಣವನಾಗಿದ್ದಾಗ ಅನಾರೋಗ್ಯಕ್ಕೆ ಒಳಗಾಗಿದ್ದೆ. ಆಗ ನನಗೆ ಔಷಧಿ ಕೊಡಿಸಲು ನನ್ನ ತಂದೆಯವರ ಬಳಿ ಹಣವಿರಲಿಲ್ಲ. ನನ್ನ ಚಿಕಿತ್ಸೆಗೆ ಸಹಾಯವಾಗಲಿ ಎಂದು ತಂದೆಯವರು ಇತರರ ಬಳಿ ಹಣ ಕೇಳಿದರೂ ಯಾರೂ ಸಹಾಯ ಮಾಡಲಿಲ್ಲವಂತೆ’ ಎಂದು ತಮ್ಮ ಬಾಲ್ಯದ ದಿನಗಳನ್ನು ನೆನಪಿಸಿಕೊಂಡರು.
‘ನಾನು ದೊಡ್ಡವನಾದ ನಂತರ ನನ್ನ ತಂದೆಯವರು ನನಗೆ ಒಂದು ಮಾತು ಹೇಳಿದರು. ಮಗ ರವಿ, ನೀನು ದೇವರನ್ನು ನೋಡಬೇಕಾದರೆ ಸಣ್ಣ ಮಕ್ಕಳಲ್ಲಿ ನೋಡು. ಆ ಮುಗ್ಧ ಮಕ್ಕಳಲ್ಲಿ ದೇವರನ್ನು ಕಾಣಬಹುದು. ಅವರಿಗೆ ಸಹಾಯ ಮಾಡಿದರೆ ದೇವರಿಗೆ ಮಾಡಿದ ಸೇವೆಯಂತೆಯೇ ಎಂದು ಹೇಳಿದರು. ತಂದೆಯವರ ಈ ಮಾತು ನನ್ನ ಮನಸ್ಸಿನ ಮೇಲೆ ಬಹಳ ಪರಿಣಾಮ ಬೀರಿತು. ಅಂದಿನಿಂದ 12 ವರ್ಷದೊಳಗಿನ ಅನಾರೋಗ್ಯದಿಂದ ಬಳಲುತ್ತಿರುವ ಮಕ್ಕಳಿಗೆ ನನ್ನ ಕೈಲಾದಷ್ಟು ಸಹಾಯ ಮಾಡುವ ಸಂಕಲ್ಪ ಮಾಡಿದ್ದೇನೆ. ನನ್ನ ಜೀವದ ಹಂಗು ತೊರೆದು ಅವರ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದೇನೆ’ ಎಂದು ರವಿ ಕಟಪಾಡಿ ಹೇಳಿದರು.
ತಮ್ಮ ವಿಶೇಷ ವೇಷದ ಸಿದ್ಧತೆ ಹಾಗೂ ಕಾರ್ಯಕ್ರಮಗಳ ಹಿಂದೆ ದೊಡ್ಡ ತಂಡವೇ ಕಾರ್ಯನಿರ್ವಹಿಸುತ್ತಿದೆ ಎಂದು ಅವರು ತಿಳಿಸಿದರು. ‘ನನ್ನ ಈ ವಿಶೇಷ ವೇಷವನ್ನು ತಯಾರಿಸಲು ಹಾಗೂ ಕಾರ್ಯಕ್ರಮಗಳಲ್ಲಿ ಸಹಕರಿಸಲು ನನ್ನ ತಂಡದಲ್ಲಿ ಸುಮಾರು 110 ಮಂದಿ ಇದ್ದಾರೆ’ ಎಂದರು.
ತಮ್ಮ ತಂಡದ ಸದಸ್ಯರ ಊಟದ ವ್ಯವಸ್ಥೆಯ ಕುರಿತು ಮಾತನಾಡಿದ ಅವರು, ವಿವಿಧ ಕಡೆಗಳಿಗೆ ಕಾರ್ಯಕ್ರಮಗಳಿಗೆ ತೆರಳಿದಾಗ ಅಲ್ಲಿನ ದಾನಿಗಳು ಹಾಗೂ ಅಭಿಮಾನಿಗಳು ತಮ್ಮ ತಂಡಕ್ಕೆ ಪೆಂಡಾಲ್ ಹಾಕಿ ಊಟದ ವ್ಯವಸ್ಥೆ ಮಾಡುತ್ತಾರೆ. ಉಡುಪಿ, ಉದ್ಯಾವರ, ಮಲ್ಪೆ ಸೇರಿದಂತೆ ಹಲವು ಕಡೆಗಳಲ್ಲಿ ಉತ್ತಮ ಆತಿಥ್ಯ ದೊರೆಯುತ್ತದೆ ಎಂದರು. ಕೆಲವು ಕಡೆಗಳಲ್ಲಿ ಕಾರ್ಯಕ್ರಮದ ನಂತರ ₹5 ಲಕ್ಷ, ₹45,000 ಹೀಗೆ ದೇಣಿಗೆ ಅಥವಾ ಗೌರವಧನ ನೀಡುತ್ತಾರೆ. ಈ ಹಣವನ್ನೂ ಮಕ್ಕಳ ಸೇವೆಗಾಗಿಯೇ ಬಳಸಲಾಗುತ್ತದೆ ಎಂದು ತಿಳಿಸಿದರು.
‘ಇಂತಹ ಒಂದು ಪ್ರಾಣಿಯ ವೇಷವನ್ನು ತಯಾರಿಸಲು ಒಟ್ಟಾರೆಯಾಗಿ ಸುಮಾರು ₹2 ಲಕ್ಷ ಖರ್ಚಾಗುತ್ತದೆ. ಈ ಹಣವನ್ನು ನಾನು ನನ್ನ ಸ್ವಂತ ದುಡಿಮೆಯಿಂದಲೇ ಭರಿಸುತ್ತೇನೆ. ಜನ್ಮಾಷ್ಟಮಿಯ ಸಂದರ್ಭದಲ್ಲಿ ಜನರು ನೀಡುವ ಹಣದಲ್ಲಿ ನಾನು ಒಂದು ಪೈಸೆಯನ್ನೂ ವೈಯಕ್ತಿಕವಾಗಿ ಬಳಸುವುದಿಲ್ಲ. ಆ ಹಣವನ್ನು ಸಂಪೂರ್ಣವಾಗಿ ಅನಾರೋಗ್ಯದಿಂದ ಬಳಲುತ್ತಿರುವ ಮಕ್ಕಳ ಆಸ್ಪತ್ರೆ ಬಿಲ್ ಹಾಗೂ ಚಿಕಿತ್ಸಾ ವೆಚ್ಚಕ್ಕಾಗಿ ನೀಡುತ್ತೇನೆ’ ಎಂದು ರವಿ ಕಟಪಾಡಿ ಸ್ಪಷ್ಟಪಡಿಸಿದರು.
ಈ ವರ್ಷ ಸುಮಾರು ಏಳು ಅನಾರೋಗ್ಯಪೀಡಿತ ಮಕ್ಕಳಿಗೆ ಆರ್ಥಿಕ ಸಹಾಯ ಮಾಡುವ ಉದ್ದೇಶ ಹೊಂದಿರುವುದಾಗಿ ಅವರು ಹೇಳಿದರು.
ಮೂರು ದಿನಗಳ ಕಾಲ ವಿಶೇಷ ವೇಷ ಧರಿಸುವ ಸಂದರ್ಭದಲ್ಲಿ ಮಲ-ಮೂತ್ರ ವಿಸರ್ಜನೆಗೆ ತೊಂದರೆಯಾಗುವುದಿಲ್ಲವೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಅವರು, ‘ಮೂರು ದಿನಗಳ ಕಾಲ ವೇಷ ಧರಿಸುವ ಸಂದರ್ಭದಲ್ಲಿ ನಾನು ಆಹಾರ ಸೇವನೆ ಮತ್ತು ನೀರು ಕುಡಿಯುವುದನ್ನು ಬಹಳ ಕಡಿಮೆ ಮಾಡುತ್ತೇನೆ. ಆದ್ದರಿಂದ ಮಲ-ಮೂತ್ರ ವಿಸರ್ಜನೆಯ ವಿಚಾರದಲ್ಲಿ ಹೆಚ್ಚಿನ ತೊಂದರೆಯಾಗುವುದಿಲ್ಲ. ಮಕ್ಕಳಿಗಾಗಿ ಮಾಡುವ ಸೇವೆ ಎಂಬ ಸಂಕಲ್ಪದಿಂದ ಈ ಎಲ್ಲಾ ಕಷ್ಟಗಳನ್ನು ಸಹಿಸಿಕೊಂಡು ಮುಂದುವರಿಯುತ್ತೇನೆ’ ಎಂದು ಹೇಳಿದರು.
ರವಿ ಕಟಪಾಡಿಯವರ ಸಮಾಜ ಸೇವೆಯನ್ನು ಗುರುತಿಸಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ (2017), ಯುವ ಸೇವಾ ಪ್ರಶಸ್ತಿ ಸೇರಿದಂತೆ ವಿವಿಧ ಗೌರವಗಳು ಲಭಿಸಿವೆ. 2021ರಲ್ಲಿ ‘ಕೌನ್ ಬನೇಗಾ ಕ್ರೋರ್‌ಪತಿ’ ಕಾರ್ಯಕ್ರಮದ ‘ಕರಮ್ ವೀರ್’ ವಿಭಾಗದಲ್ಲಿಯೂ ಅವರು ಭಾಗವಹಿಸಿ, ಗೆದ್ದ ಮೊತ್ತವನ್ನೂ ಬಡ ಮಕ್ಕಳ ಚಿಕಿತ್ಸೆಗೆ ಬಳಸುವುದಾಗಿ ಘೋಷಿಸಿದ್ದರು.
‘ವೇಷ ಮನರಂಜನೆಗಾಗಿ ಮಾತ್ರವಲ್ಲ; ಅದರಿಂದ ಒಬ್ಬ ಮಗುವಿನ ಬದುಕಿಗೆ ಬೆಳಕು ಸಿಗಬೇಕು’ ಎಂಬ ಆಶಯದೊಂದಿಗೆ ರವಿ ಕಟಪಾಡಿ ನಡೆಸುತ್ತಿರುವ ಸೇವೆ, ಕರಾವಳಿ ಕರ್ನಾಟಕದ ಮಾನವೀಯತೆ, ಕಲಾ ಪ್ರತಿಭೆ ಹಾಗೂ ಸಾಮಾಜಿಕ ಕಾಳಜಿಯ ಅಪೂರ್ವ ಸಂಗಮವಾಗಿದೆ. ತನ್ನ ಬಾಲ್ಯದ ನೋವನ್ನು ಮರೆಯದೆ, ಅದೇ ನೋವನ್ನು ಅನುಭವಿಸುತ್ತಿರುವ ಮಕ್ಕಳ ಬದುಕಿಗೆ ನೆರವಾಗಲು ತಮ್ಮ ಕಲೆ, ಸಮಯ, ಶ್ರಮ ಹಾಗೂ ಸ್ವಂತ ದುಡಿಮೆಯನ್ನು ಮುಡಿಪಾಗಿಟ್ಟಿರುವ ರವಿ ಕಟಪಾಡಿಯವರ ಸೇವೆ ನಿಜಕ್ಕೂ ಗಮನಾರ್ಹ.
ಮುಂದಿನ ದಿನಗಳಲ್ಲಿ ಕೇಂದ್ರ ಸರ್ಕಾರವು ರವಿ ಕಟಪಾಡಿಯವರ ಈ ಸಮಾಜ ಸೇವೆಯನ್ನು ಗುರುತಿಸಿ, ಅವರಿಗೆ ‘ಸಮಾಜ ರತ್ನ’ ಬಿರುದನ್ನು ನೀಡಿ ಗೌರವಿಸಬೇಕು ಎಂಬುದು ಅವರ ಸೇವೆಯನ್ನು ಹತ್ತಿರದಿಂದ ಕಂಡವರ ಆಶಯವಾಗಿದೆ.

ಜಯ ಸಿ. ಪೂಜಾರಿ
ಕೆಳಾರ್ಕಳ ಬೆಟ್ಟು