ಮುಂಬೈ, ಆಗಸ್ಟ್ 22:
ಮುಂಬೈನ ಬಂಟರ ಸಂಘದ ಗೌರವ ಪ್ರಧಾನ ಕಾರ್ಯದರ್ಶಿ, ಸಂಜೀವಿನಿ ಟ್ರಸ್ಟ್ ಸಂಸ್ಥಾಪಕ ಹಾಗೂ ಇಸ್ಸಾರ್ ಫೈನಾನ್ಷಿಯಲ್ ಸರ್ವಿಸಸ್ ಪ್ರೈವೇಟ್ ಲಿಮಿಟೆಡ್ನ ಆಡಳಿತ ನಿರ್ದೇಶಕರಾದ ಡಾ. ಆರ್. ಕೆ. ಶೆಟ್ಟಿಯವರು ಚೀನಾದ ಮಾಕಾವ್ನಲ್ಲಿ ನಡೆಯಲಿರುವ ಎಮ್.ಡಿ.ಆರ್.ಟಿ. (Million Dollar Round Table) ಗ್ಲೋಬಲ್ ಕಾನ್ಫರೆನ್ಸ್ 2025ರಲ್ಲಿ ಭಾಷಣ ಮಾಡಲು ಆಯ್ಕೆಯಾಗಿದ್ದಾರೆ. ಆಗಸ್ಟ್ 23ರಿಂದ 27ರವರೆಗೆ ನಡೆಯಲಿರುವ ಈ ಅಂತರರಾಷ್ಟ್ರೀಯ ಸಮಾರಂಭದಲ್ಲಿ ಆಗಸ್ಟ್ 24ರಂದು ಅವರು “ವಿಮಾ ಉದ್ಯಮದ ಭವಿಷ್ಯದ ಧೋರಣಿಗಳು” ಎಂಬ ಮಹತ್ವದ ವಿಷಯದ ಮೇಲೆ ಮಾತನಾಡಲಿದ್ದಾರೆ.
ವಿಶ್ವದ 11,000ಕ್ಕೂ ಹೆಚ್ಚು ಶ್ರೇಷ್ಠ ಹಣಕಾಸು ಹಾಗೂ ವಿಮಾ ತಜ್ಞರನ್ನು ಒಟ್ಟುಗೂಡಿಸುವ ಈ ಕಾನ್ಫರೆನ್ಸ್, ಜಾಗತಿಕ ನೆಟ್ವರ್ಕಿಂಗ್, ವೃತ್ತಿಪರ ಪ್ರೇರಣೆ ಮತ್ತು ಭವಿಷ್ಯಮುಖಿ ಚಿಂತನೆಗೆ ವಿಶಿಷ್ಟ ವೇದಿಕೆಯಾಗಿದೆ. ಭಾರತ ದೇಶವನ್ನು ಪ್ರತಿನಿಧಿಸಿ ಈ ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಮಾತನಾಡುವ ಗೌರವ ಡಾ. ಶೆಟ್ಟಿಯವರಿಗೆ ಸಂದಿರುವುದು ನಮ್ಮ ದೇಶದ ಹೆಮ್ಮೆ ಹೆಚ್ಚಿಸಿದೆ.
ಶ್ರೇಷ್ಠ ಸಾಧನೆಗಳ ಹಾದಿಯಲ್ಲಿ
ಪ್ರತಿಯೊಬ್ಬ ಕ್ರಿಕೆಟಿಗನಿಗೂ ಲಾರ್ಡ್ಸ್ ಮೈದಾನದಲ್ಲಿ ಆಡುವುದು ಕನಸು ಇದ್ದಂತೆ, ಪ್ರತಿಯೊಬ್ಬ ವಿಮಾ ಸಲಹೆಗಾರನಿಗೂ ಎಮ್.ಡಿ.ಆರ್.ಟಿ. ಸದಸ್ಯತ್ವ ಜೀವನದ ಅತಿ ದೊಡ್ಡ ಸಾಧನೆಯಾಗಿದೆ. ಡಾ. ಆರ್.ಕೆ. ಶೆಟ್ಟಿ ಅವರು ನಿರಂತರವಾಗಿ 21 ವರ್ಷಗಳ ಕಾಲ ಎಮ್.ಡಿ.ಆರ್.ಟಿ. ಸದಸ್ಯರಾಗಿ ಸೇವೆ ಸಲ್ಲಿಸುತ್ತಿರುವುದು ವಿಶೇಷ ಗೌರವಕ್ಕೆ ಪಾತ್ರವಾಗಿದೆ.
ಅವರ ಸಾಧನೆಗಳ ಪೈಕಿ:
ಎಮ್.ಡಿ.ಆರ್.ಟಿ. ಸದಸ್ಯತ್ವ – 28 ಬಾರಿ (ಅಮೆರಿಕಾ)
ಕೋರ್ಟ್ ಆಫ್ ದ ಟೇಬಲ್ ಗೌರವ – 23 ಬಾರಿ
ಟಾಪ್ ಆಫ್ ದ ಟೇಬಲ್ ಅರ್ಹತೆ – 19 ವರ್ಷಗಳ ಕಾಲ ನಿರಂತರವಾಗಿ (ಎಮ್.ಡಿ.ಆರ್.ಟಿ.ಯ ಅತಿ ಉನ್ನತ ಗೌರವ)
ಎಮ್.ಡಿ.ಆರ್.ಟಿ. ಪ್ರದೇಶ ಅಧ್ಯಕ್ಷ, ಭಾರತ ದೇಶದ ಅಧ್ಯಕ್ಷ ಹಾಗೂ ಭಾರತ–ನೇಪಾಳ–ಪಾಕಿಸ್ತಾನ ಝೋನ್ ಅಧ್ಯಕ್ಷರಾಗಿ ಕಾರ್ಯನಿರ್ವಹಣೆ
ಎಮ್.ಡಿ.ಆರ್.ಟಿ. ಇತಿಹಾಸದಲ್ಲಿ ಮೊದಲ ಭಾರತೀಯ ವಿಭಾಗೀಯ ಉಪಾಧ್ಯಕ್ಷ
ಎಮ್.ಡಿ.ಆರ್.ಟಿ. ವ್ಯವಸ್ಥಾಪನ ಮಂಡಳಿಯಲ್ಲಿ 16 ಜಾಗತಿಕ ನಾಯಕರ ಜೊತೆ ಸೇವೆ
ಡೆನ್ವರ್ (ಕೊಲೊರಾಡೋ) ಎಮ್.ಡಿ.ಆರ್.ಟಿ. ವಾರ್ಷಿಕ ಸಭೆಯ ಉದ್ಘಾಟನಾ ಸಮಾರಂಭದಲ್ಲಿ ಜಾಗತಿಕ ಧ್ವಜ ಹೊತ್ತ ಏಕೈಕ ಭಾರತೀಯರು
ಎಮ್.ಡಿ.ಆರ್.ಟಿ. ಅಧ್ಯಕ್ಷರಿಂದ “Quarter Century Club” ಗೌರವ ಪತ್ರ
ಮಂಗಳೂರು ವಿಶ್ವವಿದ್ಯಾನಿಲಯದ 43ನೇ ಸ್ಥಾಪನಾ ದಿನಾಚರಣೆಯಲ್ಲಿ “ಜಾಗತಿಕ ಸಾಧಕ ಪ್ರಶಸ್ತಿ” ಸ್ವೀಕಾರ
ಇಷ್ಟೇ ಅಲ್ಲದೆ, ಅಮೆರಿಕದ ಇಂಡಿಯಾನಾಪೊಲಿಸ್, ಆರ್ಲ್ಯಾಂಡೋ, ಸಿಂಗಾಪುರ, ಫ್ಲೋರಿಡಾ ಮುಂತಾದ ಅನೇಕ ಅಂತರರಾಷ್ಟ್ರೀಯ ವೇದಿಕೆಗಳಲ್ಲಿಯೂ ಅವರು 300ಕ್ಕೂ ಹೆಚ್ಚು ಪ್ರಭಾವಿ ಭಾಷಣಗಳನ್ನು ನೀಡಿದ್ದಾರೆ. ಟಾಪ್ ಆಫ್ ದ ಟೇಬಲ್ ವಾರ್ಷಿಕ ಸಭೆಯ ಮುಖ್ಯ ವೇದಿಕೆ ಮೇಲೆ ಭಾಷಣ ಮಾಡಿದ ಮೊದಲ ಭಾರತೀಯರು ಎಂಬ ಹೆಗ್ಗಳಿಕೆಯನ್ನು ಅವರು ಗಳಿಸಿದ್ದಾರೆ.
ಡಾ. ಶೆಟ್ಟಿಯವರ ಈ ಸಾಧನೆಗೆ ಮುಂಬೈ ಬಂಟರ ಸಂಘದ ಅಧ್ಯಕ್ಷ ಪ್ರವೀಣ್ ಭೋಜ ಶೆಟ್ಟಿ ಹಾಗೂ ಸಂಘದ ಪದಾಧಿಕಾರಿಗಳು, ಹಾಗೆಯೇ ಜಾಗತಿಕ ಬಂಟರ ಸಂಘಗಳ ಒಕ್ಕೂಟದ ಅಧ್ಯಕ್ಷ ಐಕಳ ಹರೀಶ್ ಶೆಟ್ಟಿ ಮತ್ತು ತಂಡ ಹೃತ್ಪೂರ್ವಕ ಅಭಿನಂದನೆ ಸಲ್ಲಿಸಿದ್ದಾರೆ.
ಭಾರತೀಯ ಹಣಕಾಸು ಕ್ಷೇತ್ರವನ್ನು ಜಾಗತಿಕ ವೇದಿಕೆಯಲ್ಲಿ ಪ್ರತಿನಿಧಿಸುವ ಡಾ. ಆರ್. ಕೆ. ಶೆಟ್ಟಿಯವರ ಈ ಸಾಧನೆ ನೂರಾರು ಯುವ ವಿಮಾ ಸಲಹೆಗಾರರಿಗೆ ಪ್ರೇರಣೆಯಾಗಲಿದೆ.
