ಚಿತ್ರ: ಧನಂಜಯ ಪೂಜಾರಿ, ವರದಿ: ಇನ್ನಂಜೆ ಜಯರಾಮ್
ಮುಂಬೈ: ಬೊರಿವಲಿ ಪೂರ್ವದ ಶ್ರೀಕೃಷ್ಣ ನಗರದ ನ್ಯಾನ್ಸಿ ಕಾಂಪ್ಲೆಕ್ಸ್ನಲ್ಲಿ (ನವೀಕೃತ ಡಿಜಿಯಸ್ ಶೀತಲ್ ರಿಗಾಲಿಯಾ) ನೆಲೆಸಿರುವ ಪುರಾತನ ಇತಿಹಾಸ ಪ್ರಸಿದ್ಧ ಗಾಂಪ್ಲೇವಿ ಶ್ರೀ ಜಗದೀಶ್ವರಿ ಅಮ್ಮನವರ ಶಿಲಾಮಯ ಮಂದಿರದ ಪುನರ್ಪ್ರತಿಷ್ಠಾಪನೆ ಹಾಗೂ ಬ್ರಹ್ಮಕಲಶೋತ್ಸವದ ಅಂಗವಾಗಿ ಬುಧವಾರ ಧಾರ್ಮಿಕ ವಿಧಿವಿಧಾನಗಳು ಮತ್ತು ಸಾಂಸ್ಕೃತಿಕ ಸೌರಭದೊಂದಿಗೆ ಭಕ್ತಿ ಸಾಗರವೇ ಹರಿಯಿತು.
ಬುಧವಾರ ಬೆಳಿಗ್ಗೆ ಉಷಃಕಾಲದಲ್ಲಿ ದೇವಳದ ಪ್ರಧಾನ ಅರ್ಚಕರಾದ ವಿಜಯ ಉಪಾಧ್ಯಾಯ ಅವರ ಪೌರೋಹಿತ್ಯದಲ್ಲಿ ಲೋಕಕಲ್ಯಾಣಾರ್ಥವಾಗಿ ಭೂ ವರಾಹ ಹೋಮ ಹಾಗೂ ಪವಿತ್ರ ಬಿಂಬಶುದ್ಧಿ ಕಾರ್ಯಕ್ರಮಗಳು ಶಾಸ್ತ್ರೋಕ್ತವಾಗಿ ನೆರವೇರಿದವು. ಸಂಜೆಯ ಸುಮುಹೂರ್ತದಲ್ಲಿ ಭಕ್ತಾದಿಗಳ ಜಯಘೋಷದ ನಡುವೆ ಜಗದೀಶ್ವರಿ ಅಮ್ಮನವರು, ಗಣಪತಿ ಹಾಗೂ ನಾಗದೇವರ ಬಿಂಬಗಳ ಶೈಯ್ಯಾಧಿವಾಸ ಮತ್ತು ಅಷ್ಟಬಂಧ ಅಧಿವಾಸ ಪ್ರಕ್ರಿಯೆಗಳು ವಿಧ್ಯುಕ್ತವಾಗಿ ನಡೆದವು. ಮಂತ್ರಘೋಷಗಳ ನಿನಾದದಿಂದ ಇಡೀ ಪರಿಸರವು ಆಧ್ಯಾತ್ಮಿಕ ಲಹರಿಯಲ್ಲಿ ಮಿಂದೆದ್ದಿತು.
ಕುಣಿತ ಭಜನಾ ವೈಭವ
ಸಂಜೆ ನಡೆದ ಕುಣಿತ ಭಜನೆಯು ಭಕ್ತರ ಕಣ್ಮನ ಸೆಳೆಯಿತು. ಭಕ್ತಿಯ ಪರಾಕಾಷ್ಠೆಯನ್ನು ತಲುಪಿದ ಎಂಟು ಪ್ರಮುಖ ಭಜನಾ ಮಂಡಳಿಗಳು ಈ ಉತ್ಸವಕ್ಕೆ ಕಳೆ ನೀಡಿದವು. ಭಾಗವಹಿಸಿದ ತಂಡಗಳು:
- ಶ್ರೀ ಬಾಲಕೃಷ್ಣ ಭಜನಾ ಮಂಡಳಿ, ಬಾಯಿಂದರ್
- ಬಿಲ್ಲವರ ಅಸೋಸಿಯೇಷನ್ ಮೀರಾ ರೋಡ್ ಮಕ್ಕಳ ಭಜನಾ ಮಂಡಳಿ
- ಬಿಲ್ಲವರ ಅಸೋಸಿಯೇಷನ್ ಮೀರಾ ರೋಡ್ ಮಹಿಳೆಯರ ಭಜನಾ ಮಂಡಳಿ
- ಶ್ರೀ ಮಹಿಷ ಮರ್ದಿನಿ ಮಂದಿರ, ಬೋರಿವಲಿ ಪಶ್ಚಿಮ
- ಶ್ರೀ ಶನಿ ಮಂದಿರ, ಮೀರಾ ರೋಡ್
- ಚಿನ್ನರ ಬಿಂಬ, ಮೀರಾ ರೋಡ್
- ಇಚ್ಛಾ ಪೂರ್ತಿ ಅಯ್ಯಪ್ಪ ಮಂದಿರ, ಬೋರಿವಲಿ ಪಶ್ಚಿಮ
- ಶ್ರೀ ದುರ್ಗಾಪರಮೇಶ್ವರಿ ಶನೇಶ್ವರ ಮಂಡಳಿ, ರಾವಲ್ಪಾಡ ದಹಿಸರ್
ತಾಳ-ಮದ್ದಲೆಗಳ ಲಯಬದ್ಧ ಸದ್ದಿಗೆ ಪಾದಗಳ ಹೆಜ್ಜೆಗಳು ಮೇಳೈಸಿದಾಗ ನೆರೆದಿದ್ದ ಭಕ್ತ ಸಮೂಹ ಪುಳಕಿತಗೊಂಡಿತು. ದಹಿಸರ್ನ ಹನುಮಾನ್ ಮಹಿಳಾ ಭಜನಾ ಮಂಡಳಿಯ ಸದಸ್ಯರು ಕಾರ್ಯಕ್ರಮದ ವ್ಯವಸ್ಥೆ ಮತ್ತು ಯಶಸ್ಸಿನಲ್ಲಿ ಸಕ್ರಿಯವಾಗಿ ಸಹಕರಿಸಿದರು. ಭಜನಾ ಕಾರ್ಯಕ್ರಮವನ್ನು ರತ್ನಾಕರ ಅಂಚನ್ ಅವರು ತಮ್ಮ ಆಕರ್ಷಕ ಶೈಲಿಯಲ್ಲಿ ನಿರೂಪಿಸಿ ನಿರ್ವಹಿಸಿದರೆ, ತ್ರಿಪೇಶ್ ಬಂಗೇರ ಅವರು ಸಾಥ್ ನೀಡಿದರು.
ಈ ಪವಿತ್ರ ಸಂದರ್ಭದಲ್ಲಿ ಟ್ರಸ್ಟ್ನ ಅಧ್ಯಕ್ಷರಾದ ಶೇಖರ್ ಎಂ. ಕೋಟ್ಯಾನ್, ಕಾರ್ಯದರ್ಶಿ ರವೀಂದ್ರ ಆರ್. ಮೆಂಡನ್, ಕೋಶಾಧಿಕಾರಿ ಚೇತನ್ ಎಚ್. ಪೂಜಾರಿ ಉಪಸ್ಥಿತರಿದ್ದರು. ಸಲಹಾ ಮಂಡಳಿಯ ಸದಸ್ಯರಾದ ಈಶ್ವರ ದೇವ ಶುಕ್ಲಾ, ರಾಜೇಶ್ ಪೂಜಾರಿ, ಅರುಣ ಮೋಲಿ, ರೋಹಿತ್ ಸುವರ್ಣ, ಶ್ರೀಮತಿ ಪುಷ್ಪ ಜಿ. ಬಂಗೇರಾ, ಸಂತೋಷ್ ಸಪಲಿಗ, ಸುಧೀರ್ ಕೋಟ್ಯಾನ್ ಸೇರಿದಂತೆ ನೂರಾರು ಭಕ್ತಾದಿಗಳು ಪಾಲ್ಗೊಂಡು ಅಮ್ಮನವರ ಕೃಪೆಗೆ ಪಾತ್ರರಾದರು.
ನವೀಕೃತಗೊಂಡಿರುವ ಈ ಶಿಲಾಮಯ ಮಂದಿರವು ಬೊರಿವಲಿ ಭಾಗದ ಪ್ರಮುಖ ಆಧ್ಯಾತ್ಮಿಕ ಕೇಂದ್ರವಾಗಿ ಹೊರಹೊಮ್ಮುತ್ತಿದ್ದು, ಬ್ರಹ್ಮಕಲಶೋತ್ಸವದ ಸಡಗರ ಎಲ್ಲೆಡೆ ಮನೆಮಾಡಿದೆ.
