ಆಧ್ಯಾತ್ಮಿಕತೆಯ ಮಹಾಸಂಗಮ ಎಂದೇ ಕರೆಯಲ್ಪಡುವ ನಾಸಿಕ್-ತ್ರಿಂಬಕೇಶ್ವರ ಕುಂಭಮೇಳಕ್ಕೆ ಸಿದ್ಧತೆಗಳು ಭರದಿಂದ ಸಾಗುತ್ತಿದ್ದು, ಮುಂಬರುವ 2026-27ರ ಕುಂಭಮೇಳದ ಅಧಿಕೃತ ಲೋಗೋವನ್ನು ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಅವರು ಇತ್ತೀಚೆಗೆ ಅನಾವರಣಗೊಳಿಸಿದರು.
ಈ ಬಾರಿ ಕುಂಭಮೇಳವನ್ನು ಅತ್ಯಂತ ವೈಭವೋಪೇತವಾಗಿ ಮತ್ತು ದೈವಿಕವಾಗಿ ಆಯೋಜಿಸಲು ಮಹಾರಾಷ್ಟ್ರ ಸರ್ಕಾರ ಸಂಕಲ್ಪ ಮಾಡಿದೆ. 13 ಪ್ರಮುಖ ಅಖಾಡಗಳ ಪ್ರತಿನಿಧಿಗಳ ಸಮ್ಮುಖದಲ್ಲಿ ಬಿಡುಗಡೆಯಾದ ಈ ಲೋಗೋ, ಭಾರತದ ಶ್ರೀಮಂತ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಪರಂಪರೆಯನ್ನು ಪ್ರತಿಬಿಂಬಿಸುತ್ತದೆ. ದೇಶಾದ್ಯಂತ ನಡೆಸಲಾದ ಲೋಗೋ ವಿನ್ಯಾಸ ಸ್ಪರ್ಧೆಯಲ್ಲಿ 3,000ಕ್ಕೂ ಹೆಚ್ಚು ವಿನ್ಯಾಸಗಳು ಬಂದಿದ್ದು, ಸುಮಿತ್ ಕೇಟ್ ಅವರು ವಿನ್ಯಾಸಗೊಳಿಸಿದ ಲೋಗೋ ಪ್ರಥಮ ಬಹುಮಾನದೊಂದಿಗೆ ಅಧಿಕೃತ ಲೋಗೋ ಆಗಿ ಆಯ್ಕೆಯಾಗಿದೆ.
ಈ ಲೋಗೋದಲ್ಲಿ ಶಿವನ ತ್ರಿಶೂಲ, ಪವಿತ್ರ ಗೋದಾವರಿ ನದಿ, ತ್ರ್ಯಂಬಕೇಶ್ವರ ದೇವಾಲಯ ಮತ್ತು ಐತಿಹಾಸಿಕ ಕಲಾರಾಮ ದೇವಾಲಯದ ಕಮಾನುಗಳನ್ನು ಅತ್ಯಂತ ಕಲಾತ್ಮಕವಾಗಿ ಸಂಯೋಜಿಸಲಾಗಿದೆ. ಕುಂಭಮೇಳಕ್ಕೆ ಬರುವ ಲಕ್ಷಾಂತರ ಭಕ್ತರು ಮತ್ತು ಸಾಧು-ಸಂತರಿಗೆ ವಿಶ್ವ ದರ್ಜೆಯ ಮೂಲಸೌಕರ್ಯ ಹಾಗೂ ಸೌಲಭ್ಯಗಳನ್ನು ಒದಗಿಸಲು ಸರ್ಕಾರವು ಈಗಾಗಲೇ ಸಮನ್ವಯ ಸಮಿತಿಗಳ ಮೂಲಕ ಕಾರ್ಯಪ್ರವೃತ್ತವಾಗಿದೆ.
ಕುಂಭಮೇಳದ ವೇಳಾಪಟ್ಟಿ:
ಸಿಂಹಸ್ಥ ಕುಂಭಮೇಳವು ಅಕ್ಟೋಬರ್ 31, 2026 ರಂದು ಅಧಿಕೃತವಾಗಿ ಪ್ರಾರಂಭವಾಗಲಿದ್ದು, ಜುಲೈ 24, 2028 ರವರೆಗೆ ಮುಂದುವರಿಯಲಿದೆ. ಈ ಮಹೋತ್ಸವದ ಅತ್ಯಂತ ಪ್ರಮುಖ ಘಟ್ಟವಾದ ‘ರಾಜ ಸ್ನಾನ’ ಅಥವಾ ಶಾಹಿ ಸ್ನಾನವು 2027 ರಲ್ಲಿ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ.
