ಮುಂಬೈ: ಆಹಾರ ಸುರಕ್ಷತೆ ಮತ್ತು ನೈರ್ಮಲ್ಯ ನಿಯಮಗಳ ತೀವ್ರ ಉಲ್ಲಂಘನೆಯ ಹಿನ್ನೆಲೆಯಲ್ಲಿ ಮುಂಬೈನ ಫೋರ್ಟ್ ಪ್ರದೇಶದಲ್ಲಿರುವ ಪ್ರಸಿದ್ಧ ಹಾಗೂ ಆರು ದಶಕಗಳಷ್ಟು ಹಳೆಯ ಉಡುಪಿ ಶೈಲಿಯ ‘ಪೂರ್ಣಿಮಾ ರೆಸ್ಟೋರೆಂಟ್’ನ ಎಫ್ಎಸ್ಎಸ್ಎಐ (FSSAI) ಪರವಾನಗಿಯನ್ನು ಮಹಾರಾಷ್ಟ್ರ ಆಹಾರ ಮತ್ತು ಔಷಧ ಆಡಳಿತ ಪ್ರಾಧಿಕಾರ (FDA) ತಕ್ಷಣದಿಂದ ಜಾರಿಗೆ ಬರುವಂತೆ ಅಮಾನತುಗೊಳಿಸಿದೆ.
ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ (BSE) ಹಾಗೂ ಬಾಂಬೆ ಹೌಸ್ ಸಮೀಪದ ರಾಜಾ ಬಹದ್ದೂರ್ ಕಾಂಪೌಂಡ್ನಲ್ಲಿರುವ ಈ ಐತಿಹಾಸಿಕ ಉಪಹಾರ ಗೃಹವು ಪ್ರತಿದಿನ ನೂರಾರು ಗ್ರಾಹಕರಿಂದ ತುಂಬಿರುತ್ತಿತ್ತು. ಜುಲೈ 23 ರಂದು ಆಹಾರ ಸುರಕ್ಷತಾ ಅಧಿಕಾರಿ ಆರ್. ಎಸ್. ಸೂರ್ಯವಂಶಿ ನೇತೃತ್ವದಲ್ಲಿ ನಡೆಸಲಾದ ತಪಾಸಣೆಯ ವೇಳೆ ಸಾರ್ವಜನಿಕ ಆರೋಗ್ಯಕ್ಕೆ ಗಂಭೀರ ಅಪಾಯವನ್ನುಂಟುಮಾಡುವ ಹಲವು ಲೋಪಗಳು ಪತ್ತೆಯಾಗಿವೆ.
ತಪಾಸಣೆಯ ಸಮಯದಲ್ಲಿ ಸಾಂಬಾರ್ ತಯಾರಿಸಲು ಬಳಸುವ ನುಗ್ಗೆಕಾಯಿ ಹಾಗೂ ರೆಸ್ಟೋರೆಂಟ್ನ ಪ್ರಸಿದ್ಧ ಖಾದ್ಯವಾದ ‘ಬನಾನ ವಡಾ’ಗೆ ಬಳಸಲಾಗುವ ಬಾಳೆಹಣ್ಣು ಸೇರಿದಂತೆ ದಾಸ್ತಾನು ಮಾಡಲಾಗಿದ್ದ ಹಸಿ ತರಕಾರಿಗಳಲ್ಲಿ ಶಿಲೀಂಧ್ರ (Fungal growth) ಬೆಳೆದಿರುವುದು ಕಂಡುಬಂದಿದೆ. ಇಡ್ಲಿ ಮತ್ತು ದೋಸೆ ಹಿಟ್ಟು ಹುಳಿ ಗುಣವನ್ನು ಹೊಂದಿರುವುದರಿಂದ, ಅಡುಗೆ ಮನೆಯಲ್ಲಿ ಕಂಡುಬಂದ ಇಂತಹ ಶಿಲೀಂಧ್ರಗಳ ಸೋಂಕು ಗ್ರಾಹಕರ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ಎಫ್ಡಿಎ ಅಧಿಕಾರಿಗಳು ಕಳವಳ ವ್ಯಕ್ತಪಡಿಸಿದ್ದಾರೆ.
ಇದಷ್ಟೇ ಅಲ್ಲದೆ, ಬೇಯಿಸಿದ ಮತ್ತು ಶೀತಲೀಕರಿಸಿದ (Frozen) ಆಹಾರ ಪದಾರ್ಥಗಳ ಜೊತೆಯಲ್ಲೇ ಕಲುಷಿತ ಹಸಿ ಪದಾರ್ಥಗಳನ್ನು ದಾಸ್ತಾನು ಮಾಡಲಾಗಿತ್ತು. ಅಡುಗೆ ಮನೆಯಲ್ಲಿ ವಿಪರೀತ ನೊಣಗಳ ಕಾಟ, ನಿಂತ ನೀರು, ಕಾಕ್ರೋಚ್ ಟ್ರ್ಯಾಪ್ಗಳಿಲ್ಲದ ಅಸ್ವಚ್ಛ ಚರಂಡಿಗಳು ಹಾಗೂ ಸಿಪ್ಪೆ ಸುಲಿಯುತ್ತಿದ್ದ ಗೋಡೆ ಮತ್ತು ತುಕ್ಕು ಹಿಡಿದ ಛಾವಣಿಗಳು ಪತ್ತೆಯಾಗಿವೆ. ಜೊತೆಗೆ ಆಹಾರ ತಯಾರಿಸುವ ಸಿಬ್ಬಂದಿಗಳ ವೈದ್ಯಕೀಯ ತಪಾಸಣಾ ದಾಖಲೆಗಳು ಹಾಗೂ ಸಕಾಲಿಕ ಆರೋಗ್ಯ ದೃಢೀಕರಣ ಪತ್ರಗಳು ಲಭ್ಯವಿಲ್ಲದಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ.
